ନୂଆଦିଲ୍ଲୀ: କେନ୍ଦ୍ର ସରକାରଙ୍କ ଅଗ୍ନିବୀର ଯୋଜନାକୁ ସମାଲୋଚନା କରି ପୁଣି ଥରେ ବିବାଦ ଘେରକୁ ଆସିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ଦେଶକୁ ଦୁଇ ପ୍ରକାର ‘ଶହୀଦ’ଙ୍କ ଆବଶ୍ୟକତା ନାହିଁ ବୋଲି ରାହୁଲ ଶନିବାର ବିହାରର ଭାଗଲପୁରରେ ଏକ ରାଲିରେ ଯୋଗଦେବା ଅବସରରେ କହିଛନ୍ତି।
ରାଲିକୁ ଉଦବୋଧନ ଦେଇ ରାହୁଲ କହିଥିଲେ, ଇଣ୍ତିଆ ମେଣ୍ଟ କ୍ଷମତାକୁ ଫେରିଲେ ତୁରନ୍ତ ଅଗ୍ନିବୀର ଯୋଜନାକୁ ଉଚ୍ଛେଦ କରାଯିବ । ଭାରତ ପାଇଁ ଦୁଇ ପ୍ରକାର ଶହୀଦଙ୍କ ଲୋଡ଼ାନାହିଁ । ଗୋଟିଏ ପ୍ରକାର ଶହୀଦ ଦରକାର । ସମସ୍ତେ ପେନ୍ସନ ପାଇବା ଉଚିତ । ଦୁଇଟି ଅଲଗା ପ୍ରକାର ଯବାନ ଦରକାର ନାହାନ୍ତି । ରାହୁଲଙ୍କ ଏପରି ମନ୍ତବ୍ୟକୁ ବିଜେପି ପକ୍ଷରୁ କଡ଼ା ସମାଲୋଚନା କରାଯାଇଛି। ବିଜେପି ମୁଖପାତ୍ର ମନ୍ଜିନ୍ଦର ସିଂ ସିର୍ସା ଏହି ମନ୍ତବ୍ୟକୁ ଅତ୍ୟନ୍ତ ଅସମ୍ବେଦନଶୀଳ ବୋଲି କହିଛନ୍ତି । ସିର୍ସା କହିଛନ୍ତି, ଆମ ଯବାନ କାହିଁକି ଶହୀଦ ହେବେ। ଆମ ଯବାନମାନେ ଶତ୍ରୁର ଶିର ଚ୍ଛେଦନ କରନ୍ତି। ଆପଣ କାହିଁକି ଆମ ଯବାନଙ୍କୁ ଶହୀଦ କରିବାକୁ ଇଚ୍ଛୁକ ବୋଲି ସିର୍ସା ରାହୁଲଙ୍କୁ ପ୍ରଶ୍ନ କରିଛନ୍ତି।
ତେବେ ଶନିବାର ରାଲିରେ ରାହୁଲ ଚଳିତ ନିର୍ବାଚନରେ ବିଜେପିର ସୀମିତ ସଫଳତା ନେଇ ଆକଳନ କରିଛନ୍ତି। ସ କହିଛନ୍ତି, ବିଜେପି ନେତାମାନେ କହୁଛନ୍ତି ଯେ, ଆମେ ଏଥର ଏତେ ଆସନରେ ଜିତିବୁ, ସେତେ ଆସନରେ ଜିତିବୁ। କିନ୍ତୁ ଏହି ଦଳ ୧୫୦ରୁ ଗୋଟିଏ ବି ଅଧିକ ଆସନ ପାଇବ ନାହିଁ। ଇଣ୍ଡିଆ ମେଣ୍ଟ କ୍ଷମତାକୁ ଫେରିଲେ ଅନେକ ପରିବର୍ତ୍ତନ ଅଣାଯିବ। କୃଷି ଋଣ ଛାଡ଼, ସର୍ବନିମ୍ନ ଟିକସ, ଆଶା ଏବଂ ଅଙ୍ଗନୱାଡ଼ି କର୍ମଚାରୀଙ୍କ ଦରମା ଦୁଇଗୁଣ କରାଯିବା ସହିତ ବିଭିନ୍ନ ଫସଲର ସର୍ବନିମ୍ନ ସହାୟକ ମୂଲ୍ୟ (ଏମଏସପି) ନିଶ୍ଚିତ ରୂପେ ଧାର୍ଯ୍ୟ କରାଯିବ ବୋଲି ସେ କହିଛନ୍ତି।
Comments are closed.