ମୁମ୍ବଇ . – ମୁମ୍ବଇର ଅନ୍ଧେରୀ ପୂର୍ବରେ ଥିବା ଏକ ସରକାରୀ ଡାକ୍ତରଖାନାର ତଳ ମହଲାରେ ଅଗ୍ନିକାଣ୍ଡ ଘଟି ଜଣଙ୍କର ମୃତ୍ୟୁ ହୋଇଛି । ୪୭ ଜଣଙ୍କୁ ଅଗ୍ନିଶମ ବାହିନୀର ସଦସ୍ୟମାନେ ଉଦ୍ଧାର କରିଛନ୍ତି । ନିଆଁ ଲାଗିବା ପରେ ପୁରା ଡାକ୍ତରଖାନାରେ ଧୂଆଁ ଭର୍ତ୍ତି ହୋଇଯାଇଥିଲା । ବହୁ ମହଲା ବିଶିଷ୍ଠ ଏହି ଡାକ୍ତରଖାନାରୁ ସମସ୍ତ ରୋଗୀ ଓ ତାଙ୍କର ସମ୍ପର୍କୀୟମାନଙ୍କୁ ଝରକା ବାଟ ଦେଇ ବାହାରକୁ କଢାଯାଇଥିଲା ।
ରିପୋର୍ଟ ଲେଖା ହେବା ବେଳକୁ ସନ୍ଧ୍ୟା ପର୍ଯ୍ୟନ୍ତ ଅଗ୍ନିଶମ ବାହିନୀ ପକ୍ଷରୁ ନିଆଁ ଲିଭାଇବା ପାଇଁ ଉଦ୍ୟମ ଜାରି ରହିଥିଲା । ଏହି ଡାକ୍ତରଖାନାରୁ ଜଣଙ୍କର ମୃତ ଦେହ ଉଦ୍ଧାର କରାଯାଇଛି । ତାଙ୍କର ପରିଚୟ ମିଳିପାରି ନାହିଁ । ନିଆଁ ଲିଭାଇବା ପାଇଁ ଅଗ୍ନିଶମ ବିଭାଗର ୧୦ଟି ଗାଡି ସହ ୬ଟି ଓ୍ୱଟର ଟ୍ୟାଙ୍କର ନିୟୋଜିତ ଅଛନ୍ତି ।
