ନୂଆଦିଲ୍ଲୀ: ମହାକାଶରେ ବୈଜ୍ଞାନିକମାନେ ଆକାଶଗଙ୍ଗାର ପ୍ରାଥମିକ ନିର୍ମାଣ ଖଣ୍ଡ ଗୁଡିକ ଚିହ୍ନଟ କରିଛନ୍ତି । ଅନୁସନ୍ଧାନରୁ ଜଣାପଡିଛି ଯେ ଉଭୟ ଦୁଇଟି ନିର୍ମାଣ ଖଣ୍ଡ ୧୨-୧୩ ବିଲିୟନ ବର୍ଷର ପୁରୁଣା ହେବ । ବ୍ରହ୍ମାଣ୍ଡରେ ଆକାଶଗଙ୍ଗା ନିର୍ମାଣ ଆରମ୍ଭ ହେବା ସମୟରେ ଏହା ପ୍ରାୟ ସମାନ ସମୟ ବୋଲି କୁହାଯାଉଛି । ତାରାଙ୍କ ଏହି ସମୂହକୁ ‘ଶକ୍ତି ଏବଂ ଶିବ’ର ନାମ ଦିଆଯାଇଛି । ଜ୍ୟୋର୍ତିବିଜ୍ଞାନୀମାନେ କହିଛନ୍ତି ଏହି ଅନୁସନ୍ଧନରୁ ଜଣାପଡିଛି ଯେ ଏହା ପ୍ରାଥମିକ ସ୍ତରରେ ସୀମିତ ଥିବା ବେଳେ ବର୍ତ୍ତମାନର ଏକ ବୃହତ ଆକାରରେ ପରିଣତ ହୋଇଛି । ଅନୁସନ୍ଧାନକାରୀଙ୍କ ଅନୁଯାୟୀ ଛୋଟ ଆକାଶଗଙ୍ଗାର ମିଶ୍ରଣ ଦ୍ୱାରା ଏଭଳି ଆକାଶଗଙ୍ଗା ସୃଷ୍ଟି ହୋଇଛି । ଯେତେବେଳେ ଆକାଶଗଙ୍ଗା ଗୁଡିକ ଧକ୍କା ହୋଇ ତାରା ସମୂହରେ ମିଶ୍ରିତ ହୋଇଥାଏ । ଅଧିକାଂଶ ତାରା ଗୁଡିକ ଆକାଶଗଙ୍ଗାରେ ମିଶିବା ପରେ ମଧ୍ୟ ନିଜର ଗୁଣ ବଜାୟ ରଖଥାନ୍ତି । ଯାହା ସିଧାସଳଖ ଆକାଶଗଙ୍ଗାର ଗତି ଏବଂ ଦିଗ ସହିତ ଜଡିତ ଥାଏ ।
ଦି ଆଷ୍ଟ୍ରୋଫିଜିକାଲ ଜର୍ଣ୍ଣାଲରେ ପ୍ରକାଶିତ ଅଧ୍ୟୟନ ଅନୁସାରେ ଆକାଶଗଙ୍ଗା ଗୁଡିକର ମିଶ୍ରଣ ସମୟରେ ଦୁଇଟି ଭିନ୍ନ ତାରକା ସମୂହ ସୃଷ୍ଟି ହୋଇଥିଲା । ଯାହାକୁ ଶକ୍ତି ଏବଂ ଶିବ ନାମ ଦିଆଯାଇଛି । ଆକାଶଗଙ୍ଗାର ମଧ୍ୟ ଭାଗରେ ଅବସ୍ଥିତ ତାରାମାନଙ୍କ ଅପେକ୍ଷା ଶିବ ଶକ୍ତିର ବେଗ ଅଧିକ ଥିଲା । ଏହି ତାରା ଗୁଡିକରେ ଧାତୁର ପରିମାଣ କମ୍ ଥିଲା ଯାହା ସୂଚିତ କରୁଛି ଯେ ସେମାନେ ବହୁ ପୂର୍ବରୁ ସୃଷ୍ଟି ହୋଇଥିଲେ । ନୂତନ ତାରା ଗୁଡିକରେ ଅଧିକ ଧାତବ ଉପାଦାନ ରହିଥାଏ । ଅନୁସନ୍ଧନକାରୀମାନେ ୟୁରୋପୀୟ ସ୍ପେସ୍ ଏଜେନ୍ସିର ଉପଗ୍ରହ ଦ୍ୱାରା ପ୍ରଦତ୍ତ ତଥ୍ୟ ବ୍ୟବହାର କରିଥିଲେ । ଏହାକୁ ଆମେରିକାର ସ୍ଲୋନ୍ ଡିଜିଟାଲ ସ୍କାଏ ସର୍ଭେରୁ ତାରକାଙ୍କ ତଥ୍ୟ ସହିତ ମିଶାଇ ଥିଲେ ।
Comments are closed.