ନୂଆଦିଲ୍ଲୀ: ଅଯୋଧ୍ୟାରେ ପ୍ରଭୁ ଶ୍ରୀରାମଙ୍କ ପ୍ରାଣ ପ୍ରତିଷ୍ଠା ହେବା ପରଠାରୁ ଏପରି ଅନେକ କଥା ସାମ୍ନାକୁ ଆସିଛି, ଯାହା କୌଣସି ଚମତ୍କାରରୁ କମ୍ ନୁହେଁ। ପ୍ରାଣ ପ୍ରତିଷ୍ଠା ପରେ ଭଗବାନ ରାମଙ୍କ ଆଖି ସତେ ଯେମିତି କଥା କହିବାକୁ ଲାଗିଲା। ରାମଲାଲାଙ୍କ ମୂର୍ତ୍ତି ତିଆରି କରିଥିବା ଶିଳ୍ପୀ ଅରୁଣ ଯୋଗୀରାଜ ନିଜେ ଏହାକୁ ଦୈବିକ ଚମତ୍କାରର ଆଖ୍ୟା ଦେଇଥିଲେ। ସେ କହିଥିଲେ, ମୁଁ ଯେଉଁ ମୂର୍ତ୍ତି ତିଆରି କରିଥିଲି, ଗର୍ଭଗୃହକୁ ପ୍ରବେଶ ପରେ ଏହାର ଆଭା ବଦଳିଗଲା ଏବଂ ଚକ୍ଷୁ ଜୀବନ୍ତ ହୋଇଉଠିଲା। ଏବେ ପୁଣି ରାମ ମନ୍ଦିରରେ ଏପରି କିଛି ଘଟିଛି, ଯାହାକୁ ଲୋକେ ଚମତ୍କାର ବୋଲି କହିଛନ୍ତି।
ରାମଲାଲାଙ୍କ ମନ୍ଦିରର ଗର୍ଭଗୃହରେ ଏକ ପକ୍ଷୀ ପହଞ୍ଚି ପ୍ରଭୁଙ୍କ ପରିକ୍ରମା କରିବାକୁ ଲାଗୁଛି। ମନ୍ଦିରର ଗର୍ଭଗୃହକୁ ପକ୍ଷୀର ଆଗମନକୁ ଏକ ଚମତ୍କାର ବୋଲି କୁହାଯାଉଛି ଏବଂ ଲୋକମାନେ ଏହି ଚମତ୍କାରକୁ ନିଜ ଆଖିରେ ଦେଖିଛନ୍ତି। ଲୋକେ କହିଛନ୍ତି ଯେ, ଏହି ପକ୍ଷୀ ଆଉ କେହି ନୁହେଁ ବରଂ ପକ୍ଷୀଙ୍କ ରାଜା ଗରୁଡ଼ ଦେବ, ଯିଏକି ନିଜ ପ୍ରଭୁଙ୍କ ଦର୍ଶନ କରିବାକୁ ଆସିଛନ୍ତି। ସେଠାରେ ଉପସ୍ଥିତ ଲୋକେ ଏହି ଦୃଶ୍ୟକୁ ନିଜ ଫୋନ୍ରେ କଏଦ କରିଛନ୍ତି। ଏବେ ଏହି ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହୋଇଛି।
ଏହି ଭିଡିଓକୁ ବିଜେପି ରାଷ୍ଟ୍ରୀୟ ମୁଖପାତ୍ର ସମ୍ବିତ ପାତ୍ର ନିଜ ଏକ୍ସ ଆକାଉଣ୍ଟରୁ ଶେୟାର କରିଛନ୍ତି। ଭିଡିଓରେ ଲେଖାହୋଇଛି, ଗରୁଡ଼ ଦେବ ପ୍ରଭୁ ଶ୍ରୀ ରାମଲାଲାଙ୍କ ଗର୍ଭଗୃହରେ ପରିକ୍ରମା କରୁଛନ୍ତି।
