ରେଙ୍ଗାଲି: ସମ୍ବଲପୁର ଜିଲାର ରେଙ୍ଗାଲି ବ୍ଲକ ଖିଣ୍ଡା ପଞ୍ଚାୟତରେ ସରକାରଙ୍କ ଅତିପ୍ରିୟ ନବରତ୍ନ ଗ୍ରୁପର ଏନଏଲସି କମ୍ପାନୀର କୋଇଲା ଖଣିରୁ କୋଇଲା ଉତ୍ପାଦନ ହେବାର ୪ବର୍ଷ ବିତିଗଲାଣି। କିନ୍ତୁ ଖଣି ଯୋଗୁଁ ବିସ୍ଥାପିତ ହୋଇ ଜମି ହରାଇଥିବା କ୍ଷତିଗ୍ରସ୍ତଙ୍କ ସମସ୍ୟା ଓ ଖଣି ଯୋଗୁଁ ଦେଖାଦେଇଥିବା ସମସ୍ୟାର ସମାଧାନ ହେଉନାହିଁ। ଏଥିପାଇଁ ଅସଂଖ୍ୟ ଥର ଦାବିପତ୍ର ଓ ଶାନ୍ତିପୂର୍ଣ୍ଣ ଆନ୍ଦୋଳନ କରାଯାଇଥିଲେ ମଧ୍ୟ ସମସ୍ୟା ଅସମାହିତ ହୋଇ ରହୁଛି। ପ୍ରତିଥର କମ୍ପାନୀ ଓ ପ୍ରଶାସନ ପ୍ରତିଶ୍ରୁତି ଦେଇ ପ୍ରତାରଣା କରୁଥିବାରୁ ତୀବ୍ର ଜନ ଅସନ୍ତୋଷ ପ୍ରକାଶ ପାଉଛି।
ସୋମବାର ଏହି କ୍ରମରେ ଖିଣ୍ଡା ପଞ୍ଚାୟତର ସରପଞ୍ଚ ସନ୍ଧ୍ୟାରାଣୀ ପଧାନ ଓ ଶ୍ରମିକ ନେତା ବାବୁଲୁ ରାଉତଙ୍କ ନେତୃତ୍ବରେ ଶତାଧିକ ଖଣି କ୍ଷତିଗ୍ରସ୍ତ, ବିସ୍ଥାପିତ ଜମିହରା ଓ ପ୍ରଭାବିତ ପରିବାର ଏନଏଲସି ଇଣ୍ଡିଆ ଲିମିଟେଡର ମୁଖ୍ୟ ମହାପ୍ରବନ୍ଧକଙ୍କୁ ସାକ୍ଷାତ କରି ୯ଦଫା ସମ୍ବଳିତ ଦାବିପତ୍ର ପ୍ରଦାନ କରିଛନ୍ତି। ଆସନ୍ତା ୨୫ତାରିଖ ସୁଦ୍ଧା ସମସ୍ତ ଦାବି ପୂରଣ ନହେଲେ ୨୬ ତାରିଖରୁ ଖଣିର ମୁଖ୍ୟ ଫାଟକ ସାମ୍ନାରେ ଖିଣ୍ଡା ସରପଞ୍ଚଙ୍କ ନେତୃତ୍ବରେ ଦାବି ପୂରଣ ନହେବା ଯାଏ ବିଶାଳ ଜନ ଆନ୍ଦୋଳନ କରାଯିବ ବୋଲି ଚେତାବନୀ ଦିଆଯାଇଛି।
