ଅଯୋଧ୍ୟା: ବଲିଉଡ଼ ବିଗ୍ ବି ଅମିତାଭ ବଚ୍ଚନ ଖୁବଶୀଘ୍ର ରାମନଗରୀରେ ଏକ ଘର ନିର୍ମାଣ କରିପାରନ୍ତି। ଏଥିପାଇଁ ସେ ଅଭିନନ୍ଦନ ଲୋଢା ଗ୍ରୁପ୍ ମାଧ୍ୟମରେ ଜମି କିଣିଛନ୍ତି। ଅଭିନନ୍ଦନ ଲୋଢା ଗ୍ରୁପ୍ ଅଯୋଧ୍ୟାରେ ସେଭେନ୍ ଷ୍ଟାର୍ ଟାଉନସିପ୍ ବିକଶିତ କରୁଛି। କୁହାଯାଉଛି ଯେ, ଅମିତାଭ ବଚ୍ଚନ ଏହି ଟାଉନସିପରେ ୧୦୦୦୦ ବର୍ଗଫୁଟ ଜମି କିଣିଛନ୍ତି, ଯାହାର ମୂଲ୍ୟ ୧୪.୫ କୋଟି ଟଙ୍କା। ଏହାପୂର୍ବରୁ ଅମିତାଭ ବଚ୍ଚନ ଲକ୍ଷ୍ନୌ ନିକଟସ୍ଥ କାକୋରୀରେ ମଧ୍ୟ ଜମି କିଣିଥିଲେ।
ଅମିତାଭ ଅଯୋଧ୍ୟାରେ ଯେଉଁଠି ଜମି କିଣିଛନ୍ତି ସେହି ସ୍ଥାନ ରାମ ମନ୍ଦିରଠାରୁ ମାତ୍ର ୧୫ ମିନିଟ ଦୂରରେ ଅବସ୍ଥିତ ଏବଂ ଅଯୋଧ୍ୟା ବିମାନବନ୍ଦରରୁ ଏହା ୩୦ ମିନିଟ ଦୂରରେ ବୋଲି କୁହାଯାଉଛି। ତେବେ ଏନେଇ ଅଭିନନ୍ଦନ ଲୋଢା ଗ୍ରୁପ୍ ପକ୍ଷରୁ ବିଧିବଦ୍ଧ ଭାବେ କୌଣସି ପ୍ରତିକ୍ରିୟା ମିଳିନାହିଁ।
ସୂଚନାଯୋଗ୍ୟ, ଅଯୋଧ୍ୟାରେ ପ୍ରଭୁ ଶ୍ରୀରାମଙ୍କ ଭବ୍ୟ ମନ୍ଦିର ନିର୍ମାଣ ହୋଇଛି। ଜାନୁଆରୀ ୨୨ରେ ରାମଲାଲା ତାଙ୍କ ଭବ୍ୟ ମନ୍ଦିରରେ ବିରାଜମାନ କରିବେ। ସହରର ବିକାଶ ପାଇଁ ସରକାର ହଜାର ହଜାର କୋଟି ଟଙ୍କାର ଉନ୍ନୟନମୂଳକ ପ୍ରକଳ୍ପ ଆରମ୍ଭ କରିଛନ୍ତି, ଯଦ୍ବାରା ଭବ୍ୟ ତଥା ନୂତନ ଅଯୋଧ୍ୟା ସ୍ୱପ୍ନ ସାକାର ହୋଇପାରିବ।
ମନ୍ଦିରର ଉଦଘାଟନ ପରେ ଅଯୋଧ୍ୟା ବିଶ୍ୱର ସବୁଠୁ ବଡ଼ ପର୍ଯ୍ୟଟନ ସ୍ଥଳୀ ମଧ୍ୟରୁ ଅନ୍ୟତମ ଭାବେ ଉଭା ହେବ ଏବଂ ଏହା ଏକ ବୃହତ ଆର୍ଥିକ କ୍ରୀୟାଶୀଳ କେନ୍ଦ୍ରରେ ପରିଣତ ହେବ ବୋଲି କୁହାଯାଉଛି। ଏଭଳି ସମୟରେ ହୋଟେଲ ଏବଂ ଟାଉନସିପ୍ ସହ ଜଡ଼ିତ କମ୍ପାନୀଗୁଡିକ ସହରରେ ବିପୁଳ ପୁଞ୍ଜି ନିବେଶ କରୁଛନ୍ତି।
