ନୂଆଦିଲ୍ଲୀ: ବିଗତ ୫ବର୍ଷ ମଧ୍ୟରେ ଦେଶରେ ୧୪ହଜାର ୯୨୬ଜଣ ଖରାପ ରାସ୍ତା ପାଇଁ ଦୁର୍ଘଟଣାରେ ପ୍ରାଣ ହରାଇଛନ୍ତି। ଗୁରୁବାର ସୁପ୍ରିମ କୋର୍ଟରେ ଜଷ୍ଟିସ ମଦନ ବି ଲୋକୁରଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପିଠ ଉପରୋକ୍ତ ରିପୋର୍ଟ ପାଇଁ କ୍ଷୋଭ ପ୍ରକାଶ କରିବା ସହ କେନ୍ଦ୍ର ସରକାରଙ୍କୁ ଏଥିପାଇଁ ଦାୟୀ କରିଛନ୍ତି। ସୁପ୍ରିମ କୋର୍ଟ ଏହି ଘଟଣାରେ କ୍ଷୋଭ ପ୍ରକାଶ କରି ସୀମାନ୍ତରେ ଆତଙ୍କବାଦୀଙ୍କ ଗୁଳିରେ ପ୍ରାଣ ହରାଉଥିବା ଯବାନଙ୍କଠାରୁ ସୁରକ୍ଷିତ ଦେଶର ରାସ୍ତାରେ ଅଧିକ ସଂଖ୍ୟାରେ ଦେଶବାସୀ ପ୍ରାଣ ହରାଉଛନ୍ତି ବୋଲି କହିଛନ୍ତି। ଖଣ୍ଡପିଠରେ ଜଷ୍ଟିସ ଦୀପକ ଗୁପ୍ତା ଓ ହେମନ୍ତ ଗୁପ୍ତା ଶୁଣାଣି ସମୟରେ ୨୦୧୩ରୁ ୨୦୧୭ ମଧ୍ୟରେ ଏତେ ସଂଖ୍ୟାରେ ମୃତ୍ୟୁର କାରଣ ରାସ୍ତାର ମରାମତି ସଠିକ ଭାବେ ହେଉ ନାହିଁ ବୋଲି ପ୍ରମାଣିତ ହେଉଛି ବୋଲି ଉଲ୍ଲେଖ କରିଥିଲେ। ପ୍ରଶାସନ ଏଥିପ୍ରତି ସଜାଗ ନୁହେଁ। ଖଣ୍ଡପିଠ ଏଥିପାଇଁ କେନ୍ଦ୍ର ସରକାରଙ୍କୁ ଦାୟୀ କରିଛନ୍ତି। ମାମଲାର ପରିବର୍ତ୍ତୀ ଶୁଣାଣି ଜାନୁୟାରୀରେ ହେବ।
