ଖୁଣ୍ଟା: ଖୁଣ୍ଟା ନିକଟସ୍ଥ ଶିଳଘାଟି ଗ୍ରାମର ଦୁଇ ଜଣ ଛାତ୍ର ସଡକ ଦୁର୍ଘଟଣାରେ ପ୍ରାଣ ହରାଇଥିବା ବେଳେ ଅନ୍ୟ ଜଣେ ଛାତ୍ର ଗୁରୁତର ଭାବେ ଆହତ ହୋଇଛନ୍ତି। ମୃତ ଯୁବକମାନେ ହେଲେ ଖୁଣ୍ଟା ଥାନା ଶିଳଘାଟି ଗ୍ରାମର ଦାସ ସିଂଙ୍କ ପୁଅ ଛୋଟରାୟ(୨୦) ଓ ଭୀମ ମୁର୍ମୁଙ୍କ ପୁଅ ତପନ(୧୮)। ଗୁରୁତର ଯୁବକ ହେଲେ ଜୁରାଡ଼ିହି ଗ୍ରାମର ମୁକୁନ୍ଦ ସୋରେନ(୧୭)।
ଘଟଣାରୁ ପ୍ରକାଶ ଯେ, ତିନି ସାଙ୍ଗଙ୍କ ମଧ୍ୟରୁ ଛୋଟରାୟ ଓ ମୁକୁନ୍ଦ ଖୁଣ୍ଟା ଉଚ୍ଚ ମାଧ୍ୟମିକ ବିଦ୍ୟାଳୟର ଛାତ୍ର ହୋଇଥିବା ବେଳେ ତପନ ଡୁକୁରା ଭଞ୍ଜଭୂମି ଉଚ୍ଚ ମାଧ୍ୟମିକ ବିଦ୍ୟାଳୟରେ ଅଧ୍ୟୟନ କରୁଥିବା ଜଣାଯାଇଛି। ଶନିବାର ରାତିରେ ଏକ ବାଇକରେ ସେମାନେ ଖୁଣ୍ଟା ଦିଗରୁ ଶିଳଘାଟି ଅଭିମୁଖେ ଯାଉଥିଲେ। ଛୋଟରାୟ ଓ ତପନକୁ ସେମାନଙ୍କୁ ଘରେ ଛାଡିଦେଇ ମୁକୁନ୍ଦ ବାଇକରେ ଜୁରାଡ଼ିହି ଘରକୁ ଫେରିଥାନ୍ତା। ତେବେ ଶିଳଘାଟି ଛକ ପହଞ୍ଚିବା ପୂର୍ବରୁ ସମ୍ମୁଖରୁ ଅଜଣା ଗାଡି ସେମାନଙ୍କ ବାଇକକୁ ଧକାଦେବାରୁ ଘଟଣା ସ୍ଥଳରେ ଛୋଟରାୟଙ୍କ ମୃତ୍ୟୁ ଘଟିଥିଲା। ଅନ୍ୟ ଦୁଇଜଣଙ୍କୁ ପୁଲିସ ଗାଡ଼ିରେ ଖୁଣ୍ଟା ଡାକ୍ତରଖାନାରେ ଭର୍ତ୍ତି କରାଯାଇଥିବା ବେଳେ ଡାକ୍ତରଖାନାରେ ତପନଙ୍କ ମୃତ୍ୟୁ ଘଟିଥିଲା। ଗୁରୁତର ଆହତ ମୁକୁନ୍ଦକୁ ବାରିପଦା ପଠାଯାଇଛି। ପୁଲିସ ବାଇକକୁ ଜବତ କରି ତଦନ୍ତ କରିବା ସହ ଧକ୍କା ଦେଇଥିବା ଗାଡିକୁ ଖୋଜୁଛି।
