କଲ୍ୟାଣସିଂହପୁର: ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକରେ ଥିବା ସମନ୍ୱିତ ଶିଶୁବିକାଶ ଯୋଜନା କାର୍ଯ୍ୟାଳୟର ସଭାଗୃହରେ ପଞ୍ଚାୟତସ୍ତରୀୟ ଶିଶୁସୁରକ୍ଷା କମିଟି ତଥା ବାଲ୍ୟବିବାହ ନିଷେଧ ଟାସ୍କଫୋର୍ସ କମିଟି ଓ ଶିଶୁମାନଙ୍କର ସମସ୍ୟାର ସଚେତନତା କାର୍ଯ୍ୟକ୍ରମ ‘ଶିଶୁମାନଙ୍କ ପାଇଁ ଦିନଟିଏ’ ଅନୁଷ୍ଠିତ ହୋଇଯାଇଛି। ଏଥିରେ ସମନ୍ୱିତ ଶିଶୁବିକାଶ ପ୍ରକଳ୍ପ ତଥା ବାଲ୍ୟବିବାହ ନିଷେଧ ଅଧିକାରୀ ମମତା ରାଣୀ ଦାସଙ୍କ ଅଧ୍ୟକ୍ଷତାରେ ଅନୁଷ୍ଠିତ ଶୁଣାଣିରେ ମୁଖ୍ୟ ଅତିଥି ଭାବେ ବିଡିଓ ସୁନୀଲ ଖରା ଯୋଗ ଦେଇଥିଲେ। ମଣ୍ଡଳ ସମ୍ପ୍ରସାରଣ ଅଧିକାରୀ ଚନ୍ଦନ ଦାସ ବାଙ୍ଗାରି, ଥାନା ଏସଆଇ ସଞ୍ଜୟ କୁମାର ମୁର୍ମୁ, ସ୍ୱାସ୍ଥ୍ୟ ବିଭାଗର ବ୍ଲକ ପ୍ରୋଗ୍ରାମ ଅଧିକାରୀ କୈଳାଶ କୁମାର ନାୟକ, ସରପଞ୍ଚ ଗୌତମ ବାର୍ଲ ମଞ୍ଚାସୀନ ରହିଥିଲେ। ଏଥିରେ ବ୍ରାହ୍ମଣ, ଗୌଡ଼, ଆଦିବାସୀ ଓ ଦଳିତ ସମ୍ପ୍ରଦାୟର ଲୋକଙ୍କ ସମେତ ଦୁଇଜଣ କିଶୋରୀ ବାଳିକା ଓ ଅଙ୍ଗନୱାଡି କର୍ମୀ ଉପସ୍ଥିତ ରହିଥିଲେ। ବାଲ୍ୟବିବାହ କିପରି ରୋକାଯାଇ ପାରିବ ସେ ବିଷୟରେ ପୁଙ୍ଖାନୁପୁଙ୍ଖ ଭାବରେ ଆଲୋଚନା କରିଥିଲେ। ବାଲ୍ୟବିବାହ ଜାଣିଶୁଣି ଯେଉଁ ପରିବାର କରନ୍ତି ତାଙ୍କୁ ଆଇନ ଅନୁଯାୟୀ ଦଣ୍ଡିତ ହେବେ ଓ ୧୮ବର୍ଷରୁ କମ ବୟସର ପିଲାଙ୍କୁ ବିବାହ ନ କରିବା ଓ ବିଭିନ୍ନ ଶୋଷଣରୁ ମୁକ୍ତ କରିବା ପାଇଁ ପରାମର୍ଶ ଦେଇଥିଲେ। ପଞ୍ଚାୟତସ୍ତରରେ ଶିଶୁ ସୁରକ୍ଷା କମିଟି ଗଠନ କରିବା ସହ ତାର ଦାୟିତ୍ୱ ଓ ଭୂମିକା ବିଷୟରେ ଆଲୋଚନା କରିଥିଲେ। ଶେଷରେ ସୁପରଭାଇଜର ନଳିନୀ ବୈରାଗୀ ଧନ୍ୟବାଦ ଅର୍ପଣ କରି ସଭା ସାଙ୍ଗ କରିଥିଲେ।
Comments are closed.