ପିପିଲି, :ପିପିଲି ପୌରାଞ୍ଚଳର ୫-ଟି ରୂପାନ୍ତରିତ ପିପିଲି ନୋଡାଲ ହାଇସ୍କୁଲର ଶ୍ରେଣୀଗୃହରେ ଶୁକ୍ରବାର ସାପ ଆତଙ୍କ । ପୂର୍ବାହ୍ନ ପ୍ରାୟ ୧୧ଟା ସମୟରେ ନବମ ଶ୍ରେଣୀ ( ଖ-ବିଭାଗ )ରେ ପାଠପଢା ଚାଲୁଥିବା ବେଳେ ହଠାତ ଏକ ବଡ ଧଣ୍ଡ ସାପ ଶ୍ରେଣୀଗୃହରେ ଦେଖିବାକୁ ମିଳିଥିଲା ।
ଜଣେ ଛାତ୍ରଙ୍କ ଗୋଡତଳେ ତଥା ବ୍ୟାଞ୍ଚତଳେ ସାପଟି ରହିଥିବା ବେଳେ ଏହାକୁ ନେଇ ଶ୍ରେଣୀରେ ଥିବା ଛାତ୍ରଛାତ୍ରୀମାନେ ଆତଙ୍କିତ ହୋଇ ଶ୍ରେଣୀଗୃହରୁ ବାହାରକୁ ଚାଲି ଆସିଥିଲେ । ବିଦ୍ୟାଳୟର ଦୁଇଜଣ କର୍ମଚାରୀ ସେଠାରେ ପହଞ୍ଚି ସାପକୁ ଶ୍ରେଣୀଗୃହରୁ ବାହାରକୁ କାଢିବା ପରେ ପାଠପଢା ସ୍ୱାଭାବିକ ହୋଇଥିଲା । ବିଦ୍ୟାଳୟ ଖେଳପଡିଆରେ ବର୍ଷାଜଳ ଜମି ରହୁଥିବାରୁ ସେଠାରେ ବାରମ୍ବାର ସାପ ଆତଙ୍କ ଦେଖାଦେଉଥିବା ସୂଚନା ମିଳିଛି । ବିଦ୍ୟାଳୟର ଶ୍ରେଣୀଗୃହ ଚତୁଃପାଶ୍ୱର୍କୁ ପରିସ୍କାର କରିବା ସହ ସାପ ପ୍ରବେଶକୁ ରୋକିବା ପାଇଁ ଆବଶ୍ୟକ ପଦକ୍ଷେପ ଗ୍ରହଣ କରିବାକୁ ସାଧାରଣରେ ଦାବି କରାଯାଇଛି ।
