ଆଠଗଡ: ଆଠଗଡର ଏକ ଅଗ୍ରଣୀ କଳା ଓ ସାଂସ୍କୃତିକ ଅନୁଷ୍ଠାନ ଓଁକାର ଡ୍ୟାନ୍ସ ଏକାଡେମୀର ବାର୍ଷିକ ଉତ୍ସବ ଅବସରରେ ରବିବାର ଏକ ଦୁଇଦିନିଆ ନୃତ୍ୟ ଉତ୍ସବ ସ୍ଥାନୀୟ ମହୋତ୍ସବ ପଡିଆରେ ଉଦ୍ଘାଟିତ ହୋଇଯାଇଛି । ମୁଖ୍ୟଅତିଥି ଭାବେ ନଗରପାଳ ସସ୍ମିତା ରାଉତ ଏହି ନୃତ୍ୟ ଉତ୍ସବକୁ ଉଦ୍ଘାଟନ କରି ଆଠଗଡ ଗଡଜାତ ଅଞ୍ଚଳ ଏକ କଳା ଓ ସଂସ୍କୃତିର ମାଟି ଏବଂ ଏହି ମାଟିରେ ଆଦ୍ୟଶିକ୍ଷା ଓ ସାଧନା କରି ବହୁ କଳାକାର ରାଜ୍ୟ, ଦେଶ ଓ ବିଦେଶରେ ସୁନାମ ଅର୍ଜନ କରିଛନ୍ତି ବୋଲି ପ୍ରତିକ୍ରିୟା ରଖିଥିଲେ ।
ଏହି ଅଞ୍ଚଳର ଛାତ୍ରଛାତ୍ରୀ ଶିକ୍ଷାଲାଭ ସହିତ କଳା ଓ ସଂସ୍କୃତିର ସୁରକ୍ଷା ପାଇଁ ଚେଷ୍ଟିତ ହେବା ଆବଶ୍ୟକ ବୋଲି ସେ ମତବ୍ୟକ୍ତ କରିଥିଲେ । ଏଥିରେ ମୁଖ୍ୟବକ୍ତା ଭାବେ ଯୋଗଦେଇ ଉପନଗରପାଳ ବି ଶୁଭ୍ରଶଙ୍କର ଜ୍ୟୋତି ଆଠଗଡ ମାଟିରେ ନିଜର ସାଧନା ବଳରେ ବାଣୀକଣ୍ଠ ନିମାଇଁ ହରିଚନ୍ଦନ ସଂଗୀତ ଓ କଳା କ୍ଷେତ୍ରରେ ଏକ ମାଇଲ ଖୁଣ୍ଟ ସ୍ଥାପନ କରିଯାଇଛନ୍ତି ବୋଲି କହିବା ସହ ଏ ଅଞ୍ଚଳର ଲୁକାଇତ କଳା ପ୍ରତିଭାଙ୍କୁ ଲୋକଲୋଚନକୁ ଆଣିବାରେ ଓଁକାର ନୃତ୍ୟ ପ୍ରତିଷ୍ଠାନର ପ୍ରୟାସ ପ୍ରଶଂସନୀୟ ବୋଲି ମତପ୍ରକାଶ କରିଥିଲେ । ଏଥିରେ ସମ୍ମାନିତ ଅତିଥି ଭାବେ ସହକାରୀ ଜିଲ୍ଲାପାଳ ପ୍ରଜ୍ଞାପାରମିତା ପୃଷ୍ଟି, ସୁନାମଧନ୍ୟ ଗୀତିକାର ରାଧାନାଥ ଦାସ ଓ ଏହି ନୃତ୍ୟ ପ୍ରତିଷ୍ଠାନର ଉପଦେଷ୍ଟା ଶ୍ରୀକାନ୍ତ ଦାସ ଯୋଗଦେଇ ଉଦ୍ବୋଧନ ଦେଇଥିଲେ ।
ଓଁକାର ନୃତ୍ୟ ପ୍ରତିଷ୍ଠାନର ଗୁରୁ ସମୀର ପୃଷ୍ଟିଙ୍କ ପୌରୋହିତ୍ୟରେ ଅନୁଷ୍ଠିତ ଏହି ଉଦ୍ଘାଟନୀ ଉତ୍ସବରେ ପ୍ରତିଷ୍ଠାନର ସଂପାଦକ ସୋନମ ପୃଷ୍ଟି, ଅନୁଷ୍ଠାନର ବାର୍ଷିକ ବିବରଣୀ ପ୍ରଦାନ କରିଥିଲେ । ଏହି ଅବସରରେ ଅନୁଷ୍ଠାନର କଳାକାରମାନଙ୍କ ଦ୍ୱାରା ପରିବେଷିତ ଓଡିଶୀ, ସମ୍ବଲପୁରୀ, ଆସାମର ବିହୁ ନୃତ୍ୟ ଉପସ୍ଥିତ ଦର୍ଶକଙ୍କ ମନମୋହିଥିଲା । ଏହି କାର୍ଯ୍ୟକ୍ରମରେ ସ୍ୱତନ୍ତ୍ର ଦକ୍ଷତା ଓ ପ୍ରତିଭାବାନ କଳାକାରଙ୍କ ମଧ୍ୟରେ ବଂଶୀବାଦନ ସହ ଛଉନୃତ୍ୟ ପାଇଁ ଜ୍ୟୋତିଶଙ୍କର ମହାପାତ୍ର, ଆଧୁନିକ ନୃତ୍ୟ ପାଇଁ ରମେଶ ସାହାଣୀ ଓ କଣ୍ଠ ସଂଗୀତ ପାଇଁ ସୌଜନ୍ୟା ରଥଙ୍କୁ ସମ୍ବର୍ଦ୍ଧିତ କରାଯାଇଥିଲା । ମଞ୍ଚାସୀନ ଅତିଥିଙ୍କ ସହିତ କବୟିତ୍ରୀ ପୁଲିନ ମିଶ୍ର, ସମାଜସେବୀ ସଂଜୟ ରଥ, ସଦାଶିବ ରଣା, ସାମ୍ବାଦିକ ସନ୍ତୋଷ ବାରିକ ପ୍ରମୁଖ କଳାକାରମାନଙ୍କୁ ଉତ୍ସାହିତ କରିବା ସହ ପ୍ରମାଣପତ୍ର ପ୍ରଦାନ କରିଥିଲେ । ଆଇନଜୀବୀ ଯଶୋବନ୍ତ ବାରିକ କାର୍ଯ୍ୟକ୍ରମ ସଂଯୋଜନା କରିଥିବାବେଳେ ସ୍ୱପ୍ନାରାଣୀ ବେହେରା ଓ ଅନ୍ୟମାନେ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।
