ନୂଆଦିଲ୍ଲୀ: ହନୁମାନ ଜୟନ୍ତୀ ଅବସରରେ ନୂଆଦିଲ୍ଲୀର ଜାହାଙ୍ଗିରପୁରୀ ଅଞ୍ଚଳରେ ବ୍ୟାପକ ହିଂସାକାଣ୍ଡ ଘଟିଛି । ଗତକାଲି ସଂଧ୍ୟାରେ ଏହି ହିଂସାକାଣ୍ଡ ଘଟିଥିବା ବେଳେ ପ୍ରଶାସନ ପକ୍ଷରୁ ସଂପୃକ୍ତ ଅଞ୍ଚଳରେ ସୁରକ୍ଷା ବ୍ୟବସ୍ଥାକୁ ଆହୁରି ବଢ଼ାଇ ଦିଆଯାଇଛି । ହିଂସାକାଣ୍ଡକୁ ନେଇ ପୁଲିସ ତଦନ୍ତ କରିବା ସହ ଘଟଣାରେ ଆଜି ୧୫ ଜଣଙ୍କୁ ଗିରଫ କରିଛି । ଏନେଇ ଦିଲ୍ଲୀ କମିଶନରଙ୍କ ସହ ଗୃହମନ୍ତ୍ରୀ ଅମିତ ଶାହା ମଧ୍ୟ କଥା ହୋଇଛନ୍ତି । ହିଂସାକାଣ୍ଡରେ ସମ୍ପୃକ୍ତଥିବା ଅଭିଯୁକ୍ତଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନେବାକୁ କହିଛନ୍ତି ଗୃହମନ୍ତ୍ରୀ । ତାହାସହ ଅଞ୍ଚଳରେ ଶାନ୍ତି ଫେରାଇ ଆଣିବାକୁ ସେ ଅପିଲ କରିଛନ୍ତି ।
ସୂଚନାଅନୁଯାୟୀ ଗତକାଲି ନୂଆଦିଲ୍ଲୀର ଜାହାଙ୍ଗିରପୁରୀ ଅଞ୍ଚଳରେ ହନୁମାନ ଜୟନ୍ତୀ ପାଳନ ହୋଇଥିଲା । ଶୋଭାଯାତ୍ର ବାହାରିବା ସମୟରେ ଦୁଇ ଗୋଷ୍ଠୀ ମୁହାଁମୁହିଁ ହୋଇଥିଲେ । ଉଭୟଙ୍କ ମଧ୍ୟରେ ଢେଲା ପଥର ମାଡ଼ ହୋଇଥିଲା । ଫଳରେ ହିଂସାକାଣ୍ଡ ଯୋଗୁ ୬ଜଣ ପୁଲିସ କର୍ମଚାରୀଙ୍କ ସମେତ ୭ଜଣ ଆହତ ହୋଇଥିଲେ ।
