କଟକ . – ଓଡିଶାରେ ଜନ୍ମ ଗ୍ରହଣ କରିବା ସହ ଏଠାରେ ଶିକ୍ଷା ଲାଭ କରିଥିବା ରିତେଶ ଅଗ୍ରଓ୍ୱାଲଙ୍କ ବୟସ ମାତ୍ର ୨୪ ବର୍ଷ ।ଏବେ ସେ ଦେଶର ସବୁଠାରୁ ଧନୀ ଯୁବ ଉଦ୍ୟୋଗପତି ବୋଲି ଏକ ସର୍ବେକ୍ଷଣ ସଂସ୍ଥା ରିପୋର୍ଟରେ ପ୍ରକାଶ କରିଛି । ନୂଆଦିଲ୍ଲୀରେ ହୋଟେଲ ସେବା ପର୍ଯ୍ୟଟନ ସର୍ବେକ୍ଷଣ ସଂସ୍ଥା ହୋଟେଲିଭେଟ୍ (Hotelivate) ଅନୁସାରେ ରିତେଶଙ୍କ ଦ୍ୱାରା ଆରମ୍ଭ କରାଯାଇଥିବା ‘ଓୟୋ’ ରୁମସ୍ ଏବେ ୪.୫ ବିଲିୟନ ଆମେରିକୀୟ ଡଲାର ବା ଭାରତୀୟ ମୁଦ୍ରାରେ ୩୨,୬୯୭ କୋଟି ଟଙ୍କା ବୋଲି ଆକଳନ କରାଯାଇଛି । ହୁରୁନ୍ର ଧନୀ ତାଲିକାରେ ବି ରିତେଶ ସ୍ଥାନ ପାଇଛନ୍ତି । ସେହିପରି ଫୋର୍ବସ ଇଣ୍ଡିଆର ଯୁବ ଧନୀ ଉଦ୍ୟୋଗପତି ତାଲିକାରେ ରିତେଶଙ୍କ ନାମ ସ୍ଥାନ ପାଇଛି ।
୨୦୧୩ ମସିହାରେ ରିତେଶ ମାତ୍ର ୨୧ ବର୍ଷ ବୟସରେ ‘ଓୟୋ’ ରୁମସ୍ ଆରମ୍ଭ କରିଥିଲେ । ଏବେ ଏହା ଭାରତ ସବୁଠାରୁ ବଡ ହୋଟେଲ ବୁକିଂ ନେଟଓ୍ୱର୍କ । ଏବେ ବିଦେଶରେ ବି ‘ଓୟୋ’ ରୁମସ୍ ର ସେବା ଉପଲବ୍ଧ । ସଫ୍ଟବ୍ୟାଙ୍କ ବି ‘ଓୟୋ’ ରୁମସ୍ କୁ ୧୦୦ କୋଟି ଆମେରିକୀୟ ଡଲାର ବା ୭ହଜାର ୩୦୦ କୋଟି ଟଙ୍କାର ସହାୟତା ଯୋଗାଇ ଦେବ ବୋଲି ସୂଚନା ମିଳିଛି ।
୨୦୨୩ ସୁଦ୍ଧା ବିଶ୍ୱର ସର୍ବବୃହତ ହୋଟେଲ ଚେନ୍ ହେବା ପାଇଁ ରିତେଶ ଲକ୍ଷ୍ୟ ରଖିଛନ୍ତି । ବିଶ୍ୱର ସବୁସ୍ଥାନରେ ଲୋକମାନଙ୍କୁ ଉଚ୍ଚମାନର ହୋଟଲ୍ ସେବା ଯୋଗାଇ ଦେବା ପାଇଁ ସେ ଲକ୍ଷ୍ୟ ରଖିଛନ୍ତି ।
ଓୟୋରେ ହୋଟେଲଗୁଡିକର ମାନ ନିର୍ଦ୍ଧାରଣ କରିବା ପାଇଁ ଶହ ଶହ କର୍ମଚାରୀଙ୍କୁ ନିଯୁକ୍ତି ପ୍ରଦାନ କରିଛି । ସେମାନେ ପ୍ରାୟ ୨୦୦ ଟି ବିଷୟରେ ହୋଟଲର ମାନ ନିର୍ଦ୍ଧାରଣ କରିଥାଆନ୍ତି । ସଫା ସୁତରା , ପର୍ଯ୍ୟଟକଙ୍କୁ ବ୍ୟବହାର, ବେଡ ସିଟର ମାନ, ପାନୀୟ ଜଳରମାନ, ପାଣିର ତାପମାତ୍ରା ଏପରି ଅନେକ ବିଷୟରେ ତଥ୍ୟ ସଂଗ୍ରହ କରାଯାଇଥାଏ । ପ୍ରତି କୋଠରୀ ସଂରକ୍ଷଣ ପାଇଁ ଓୟୋକୁ ୨୫ ପ୍ରତିଶତ ଅର୍ଥ ମିଳିଥାଏ ।
ରିତେଶ ଓଡିଶାର ରାୟଗଡା ଜିଲ୍ଲା ବିଷମକଟକରେ ଜନ୍ମ ଓ ଶିକ୍ଷା ଗ୍ରହଣ କରିଥିଲେ । ତାଙ୍କର ପିତାମାତା ସେ ଇଂଜିନିୟରିଂ ପଢନ୍ତୁ , ଆଇଆଇଟିରେ ନାମ ଲେଖାଇ ଭଲ ଇଂଜିନିୟର ହୁଅନ୍ତୁ ବୋଲି ଲକ୍ଷ୍ୟ ରଖିଥିଲେ । ରିତେଶ ୧୯ ବର୍ଷ ବୟସରେ ରାଜସ୍ଥାନର କୋଟାରେ ବି ଆଇଆଇଟି ପାଇଁ ପ୍ରସ୍ତୁତ ହେଉଥିଲେ । ମାତ୍ର ସେ ସେତେବେଳେ ସେ ସଫଳ ବ୍ୟବସାୟୀ ହେବେ ବୋଲି ଚିନ୍ତା କରିଥିଲେ । ଏଥିପାଇଁ ଆଇଆଇଟିର ପ୍ରସ୍ତୁତି ଛାଡି ବିଭିନ୍ନ ଶସ୍ତା ହେଟେଲରେ ରହିବା ଆରମ୍ଭ କରିଥିଲେ । ପରେ ସେ ଓରାବଲ ନାମକ ଏକ ଓ୍ବେବସାଇଟ କରି ବିଭିନ୍ନ ହୋଟେଲ ସମ୍ପର୍କରେ ତଥ୍ୟ ଦେଉଥିଲେ । ପରେ ଲୋକମାନେ ନାଁ ବୁଝି ପାରୁ ନ ଥିବେ ଭାବି ଓ୍ବେସାଇଟ ନାମ ‘ଓୟୋ’ ରୁମସ୍ କରିଥିଲେ ।
ଏବେ ‘ଓୟୋ’ ରୁମସ୍ ରେ ଦୈନିକ ଦେଢ ଲକ୍ଷ ଗ୍ରାହକ ହୋଟେଲ ବୁକ୍ କରୁଥିବା ରିତେଶ ଅଗ୍ରଓ୍ୱାଲ ସୂଚନା ଦେଇଛନ୍ତି । ‘ଓୟୋ’ ରୁମସ୍ ବିଶ୍ୱର ସଫଳ ପ୍ରତିଷ୍ଠାନ ହୋଇ ପାରିବ ବୋଲି ନ୍ୟୁୟର୍କ ଟାଇମସ୍ ବି ଏକ ରିପୋର୍ଟରେ ପ୍ରକାଶ କରିଛି ।
