ପଞ୍ଜାବ କଂଗ୍ରେସକୁ ଧକ୍କା : ନିର୍ବାଚନ ରାଜନୀତି ଛାଡ଼ିଲେ ସୁନୀଲ ଜାଖଡ଼

ଲୁଧିଆନା : ପଞ୍ଜାବ କଂଗ୍ରେସକୁ ସୋମବାର ବଡ଼ ଧକ୍କା ଲାଗିଛି। ଦଳର ବରିଷ୍ଠ ନେତା ସୁନୀଲ ଜାଖଡ଼ ସକ୍ରିୟ ନିର୍ବାଚନ ରାଜନୀତିରୁ ସନ୍ନ୍ୟାସ ଘୋଷଣା କରିଛନ୍ତି; କିନ୍ତୁ ଦଳରେ ରହିବେ ବୋଲି କହିଛନ୍ତି। ଦଳରେ ମୁଖ୍ୟମନ୍ତ୍ରୀ ପଦ ପାଇଁ ପ୍ରମୁଖ ଦାବିଦାର ଥିବା ୬୮ ବର୍ଷୀୟ ଜାଠ ନେତା ସୁନୀଲ ହେଉଛନ୍ତି ଲୋକସଭାର ପୂର୍ବତନ ବାଚସ୍ପତି ତଥା କେନ୍ଦ୍ରମନ୍ତ୍ରୀ ବଳରାମ ଜାଖଡ଼ଙ୍କ ପୁଅ। ରବିବାର ସେ ଲୁଧିଆନାଠାରେ ଆଭାସିରେ ଆୟୋଜିତ ରାହୁଲ ଗାନ୍ଧୀଙ୍କ ନିର୍ବାଚନ ସଭାରେ ଉପସ୍ଥିତ ଥିଲେ। କ୍ୟାପଟେନ୍‌ ଅମରିନ୍ଦର ସିଂହଙ୍କୁ ମୁଖ୍ୟମନ୍ତ୍ରୀ ପଦରୁ ହଟାଯିବା ସମୟରେ ଅମରିନ୍ଦରଙ୍କ ଉତ୍ତରାଧିକାରୀ ହେବା ପାଇଁ ତାଙ୍କ ପ୍ରତି ୪୨ବିଧାୟକଙ୍କ ସମର୍ଥନ ଥିବା କହି ଝଡ଼ ସୃଷ୍ଟି କରିଥିଲେ। ସେତେବେଳେ ସେ ମୁଖ୍ୟମନ୍ତ୍ରୀ ଦୌଡ଼ରେ ସବୁଠୁ ଆଗୁଆ ଥିଲେ ମଧ୍ୟ ଚରଣଜିତ ସିଂହ ଚାନ୍ନିଙ୍କୁ ଏଥିପାଇଁ ମନୋନୀତ କରାଯାଇଥିଲା। ସୁନୀଲ ଆବୋହର ଆସନରୁ ତିନି ଥର ବିଧାୟକ ତଥା ଗୁରୁଦାସପୁରରୁ ଥରେ ଲୋକସଭା ସଦସ୍ୟ ହୋଇଛନ୍ତି। ପଞ୍ଜାବ ପ୍ରଦେଶ କଂଗ୍ରେସର ସଭାପତି ମଧ୍ୟ ରହିଥିଲେ। ଏହି ପଦରୁ ତାଙ୍କ ଇସ୍ତଫା ପରେ ନବଜୋତ ସିଂହ ସିଧୁ ସଭାପତି ହୋଇଥିଲେ। ଅକାଳୀ ଦଳ ଓ ବିଜେପି ମେଣ୍ଟ ସରକାର ସମୟରେ ସେ ବିଧାନସଭାରେ ବିରୋଧୀ ଦଳ ନେତା ଥିଲେ। ଚଳିତ ନିର୍ବାଚନରେ ସୁନୀଲ ପ୍ରାର୍ଥୀ ହୋଇ ନ ଥିଲେ ମଧ୍ୟ ତାଙ୍କ ପୁତୁରା ସନ୍ଦୀପ ଜାଖଡ଼ ଆବୋହରରୁ କଂଗ୍ରେସ ପ୍ରାର୍ଥୀ ହୋଇଛନ୍ତି।