ଚେନ୍ନାଇ : ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ହତ୍ୟାକାରୀଙ୍କୁ ମୁକ୍ତ କରିବା ଲାଗି କେନ୍ଦ୍ର ସରକାରଙ୍କୁ ସୁପାରିସ କରାଯାଇଥିବା ନେଇ ଗଣମାଧ୍ୟମରେ ପ୍ରସାରିତ ଖବରକୁ ତାମିଲନାଡୁ ରାଜ୍ୟପାଳ ବନୱାରୀଲାଲ୍ ପୁରୋହିତ ଶନିବାର ଖଣ୍ଡନ କରିଛନ୍ତି। ରାଜ୍ୟପାଳଙ୍କ ପକ୍ଷରୁ କୁହାଯାଇଛି ଯେ ଏହା ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ଏହା ଉପରେ ସାମ୍ବିଧାନିକ, ପ୍ରଶାସନିକ ଏବଂ ଆଇନଗତ ପ୍ରସଙ୍ଗର ତର୍ଜମା କରିବା ଆବଶ୍ୟକତା ରହିଛି। ଏ ସମ୍ବନ୍ଧରେ ସାମ୍ବିଧାନିକ ନୀତିନିୟମ ଅନୁସାରେ ନିଷ୍ପତ୍ତି ନିଆଯିବ ବୋଲି ରାଜଭବନର ଯୁଗ୍ମ ନିର୍ଦେଶକ (ଲୋକସମ୍ପର୍କ) ଏକ ବିବୃତିରେ ପ୍ରକାଶ କରିଛନ୍ତି। ଉଲ୍ଲେଖ ଯେ ରାଜୀବଙ୍କ ହତ୍ୟା ମାମଲାର ୭ଜଣ ଦୋଷୀ ଏବେ ଆଜୀବନ କାରାଦଣ୍ଡାଦେଶ କାଟୁଛନ୍ତି।
