ନୂଆଦିଲ୍ଲୀ : ସଂଯୁକ୍ତ ଆରବ ଏମିରେଟ୍ସର ୨ଟି ସହର ଦୁବାଇ ଓ ଆବୁଧାବିରେ ଶନିବାର (ଆଜି)ଠାରୁ ଖେଳାଯିବ। ଏସିଆ କପ୍ କ୍ରିକେଟ ଟୁର୍ଣ୍ଣାମେଣ୍ଟ। ଏହି ଟୁର୍ଣ୍ଣାମେଣ୍ଟରେ ଏସିଆ ମହାଦେଶର ୬ଟି ଦେଶ ଭାଗନେବେ। ୨୦୧୬ରେ ଏସିଆ କପ୍ର ଫର୍ମାଟ୍କୁ ବଦଳାଇ ଏହାକୁ ଟ୍ୱେଣ୍ଟି୨୦ କରା ଯାଇଥିବା ବେଳେ ଚଳିତବର୍ଷ ଏହା ପୁଣି ଦିନିକିଆ ଫର୍ମାଟକୁ ଫେରିଛି। ସବୁଥର ଏଥର ମଧ୍ୟ ଟାଇଟଲ ପାଇଁ ଭାରତ, ପାକିସ୍ତାନ, ଶ୍ରୀଲଙ୍କା ଓ ବାଂଲାଦେଶ ମଧ୍ୟରେ ମୁଖ୍ୟତଃ ଲଢ଼େଇ ହେଉଥିବା ବେଳେ ଆଫ୍ଗାନିସ୍ତାନ ଓ ହଂକଂ କିଛି ବିପର୍ଯ୍ୟୟ ଘଟାଇବା ଲକ୍ଷ୍ୟରେ ରହିବେ।
ଆଜି ବାଂଲାଦେଶ ଓ ଶ୍ରୀଲଙ୍କା ମଧ୍ୟରେ ପ୍ରଥମ ମ୍ୟାଚ ଅନୁଷ୍ଠିତ ହେବ। ରୋହିତ ଶର୍ମା ନେତୃତ୍ୱାଧୀନ ଭାରତୀୟ ଦଳ ଗୁରୁବାର ୟୁନାଇଟେଡ୍ ଆରବ ଏମିରେଟ୍ସର ଦୁବାଇ ସହରରେ ପହଞ୍ଚିଛି। ୧୮ ତାରିଖରେ ଭାରତ-ହଂକଂ ମଧ୍ୟରେ ମ୍ୟାଚ୍ ଖେଳାଯିବ। ୧୯ରେ ଭାରତ-ପାକିସ୍ତାନ ମଧ୍ୟରେ ଚିତାକର୍ଷକ ମୁକାବିଲା ଅନୁଷ୍ଠିତ ହେବ।
ଏସିଆ କପ୍ର ୧୩ଟି ସଂସ୍କରଣ ମଧ୍ୟରୁ ଭାରତ ସର୍ବାଧିକ ୬ ଥର ଚମ୍ପିଆନ୍ ହୋଇଥିଲେ ହେଁ ଥରେ ମାତ୍ର ଏହି ଟୁର୍ଣ୍ଣାମେଣ୍ଟ ଆୟୋଜନ କରିଛି। ସେହିପରି ଏସିଆ କପ୍ରେ ଭାରତ ମୋଟ ୪୮ଟି ମ୍ୟାଚ୍ ଖେଳି ୩୧ଟି ଜିତିଥିବା ବେଳେ ୧୬ଟି ମ୍ୟାଚ୍ରେ ପରାସ୍ତ ହୋଇଛି। ଶ୍ରୀଲଙ୍କା ୫୨ଟି ମ୍ୟାଚ୍ ଖେଳି ୩୫ଟି ଜିତିଛି ଓ ୧୭ଟି ହାରିଛି। ୩ୟ ସଫଳ ଦଳ ପାକିସ୍ତାନ ୪୪ଟି ମ୍ୟାଚ୍ ଖେଳି ୨୬ଟି ଜିତିଛି ଓ ୧୭ଟିରେ ପରାସ୍ତ ହୋଇଛି। ବାଂଲାଦେଶ ୪୨ଟି ମ୍ୟାଚ୍ ଖେଳି ମାତ୍ର ୭ଟି ଜିତିପାରିଛି। ଏହି ୪ଟି ଦଳଙ୍କ ମଧ୍ୟରୁ ଶ୍ରୀଲଙ୍କାର ବିଜୟ ପ୍ରତିଶତ ୬୮.୬୨ ସର୍ବାଧିକ।
