କଚ୍ଛ: ଗୁଜୁରାଟର କଚ୍ଛ ପଞ୍ଚାୟତ ନିର୍ବାଚନ ବିଜୟ ପରେ ଉଠିଲା ପାକିସ୍ତାନ ଜିନ୍ଦବାଦ ନାରା । ପାକିସ୍ତାନ ଜିନ୍ଦାବାଦ ନରାକୁ ନେଇ ବିବାଦ ଉପୁଜିବାରେ ଲାଗିଛି । ଏପରି ଏକ ଘଟଣା କଚ୍ଛ ପଞ୍ଚାୟତର ଦୁଧାଇ ଗାଁରେ ହୋଇଥିବା ବେଳେ, ନିର୍ବାଚନ ବିଜୟ ପରେ ଏକ ରାଲିରେ ‘ପାକିସ୍ତାନ ଜିନ୍ଦାବାଦ’ର ସ୍ଲୋଗାନ ଦିଆଯାଇଥିଲା । ସ୍ଲୋଗାନ ଦେବାର ଭିଡିଓ ସାମ୍ନାକୁ ଆସିବା ପରେ ଗୁଜୁରାଟର ଗୃହମନ୍ତ୍ରୀ ହର୍ଷ ସଙ୍ଗଭି ଏହି ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ।ଏଥି ସହିତ ସଙ୍ଗଭି ଏହି ପ୍ରସଙ୍ଗରେ କଚ୍ଛର ରେଞ୍ଜ ଆଇଜିଙ୍କ ସହ ଆଲୋଚନା ମଧ୍ୟ କରିଛନ୍ତି ।
ଘଟଣାରେ ଅଭିଯୁକ୍ତଙ୍କ ବିରୋଧରେ କଠୋର କାର୍ୟ୍ୟାନୁଷ୍ଠାନ ଗ୍ରହଣ କରାଯିବ । କାହାକୁ ଛାଡି ଦିଆଯିବ ନାହିଁ । ସଙ୍ଗଭି ଆହୁରି ମଧ୍ୟ କହିଛନ୍ତି କି, ପାକିସ୍ତାନକୁ ସମର୍ଥନ କରି ସ୍ଲୋଗାନ ଦେବା ପାଇଁ ଏକ ମାମଲା ରୁଜୁ ହୋଇଛି। ଯେଉଁମାନେ ସ୍ଲୋଗାନ ଦେଉଛନ୍ତି ସେମାନଙ୍କୁ ଗିରଫ କରାଯିବ । ଏନେଇ ସରକାର ମଧ୍ୟ ଗୁରୁତର ପଦକ୍ଷେପ ନେଉଛନ୍ତି । ସୂଚନା ଅନୁଯାୟୀ, ଦୁଧାଇ ଗ୍ରାମପଞ୍ଚାୟତ ନିର୍ବାଚନରେ ତ୍ରିକୋଣୀୟ ଲଢ଼େଇ ହୋଇଥିଲା । ମଙ୍ଗଳବାର ସଂଧ୍ୟାରେ ନିର୍ବାଚନ ଫଳାଫଳ ଘୋଷଣା କରାଯାଇଥିଲା । ଯେଉଁଥିରେ ରିନାବେନ୍ ରଙ୍ଗୁଭାଇ କୋଠିୱାର ୧,୦୨୬ ଭୋଟ ସହିତ ବିଜେତା ଘୋଷିତ ହୋଇଥିଲେ । ଯାହାକୁ ନେଇ କୋଠିୱାରଙ୍କ ସମର୍ଥକ ମାନେ ବିଜୟ ଉତ୍ସବ ପାଳନ କରିଥିଲେ। ଆଉ ବିଜୟ ଉତ୍ସବ ମନାଇବା ବେଳେ କିଛି ସମର୍ଥକ ପାକିସ୍ତାନ ଜିନ୍ଦାବାଦର ନାରା ଦେଇଥିବା ଦେଖିବାକୁ ମିଳିଥିଲା ।
