ଝୁମ୍ପୁରା : ଝୁମ୍ପୁରା ବ୍ଲକ ନହବେଡା ପଞ୍ଚାୟତ କାଞ୍ଜିପାଣି ଗ୍ରାମର ଜଣେ ଚାଷୀ ରବିବାର ଦିନ ବିଲକୁ ହଳ କରିବା ପାଇଁ ଯାଇଥିବା ସମୟରେ ବଜ୍ରପାତ ହେବାରୁ ଘଟଣାସ୍ଥଳରେ ବାପାର ମୃତ୍ୟୁ ହୋଇଥିବା ବେଳେ ପୁଅ ଗୁରୁତର ଆହତ ହୋଇଥିବା ଜଣାଯାଇଛି।
ମିଳିଥିବା ସୂଚନାରୁ ଜଣାଯାଏ ଯେ କାଞ୍ଜିପାଣି ଗ୍ରାମର ପିତାମ୍ବର ମହାନ୍ତ (୬୪) ଏବଂ ତାଙ୍କ ପୁଅ ଝସକେତନ ମହାନ୍ତ(୩୦) ଚାଷ ଜମିକୁ ପାୱାର ଟିଲର ଏବଂ ପାଣି ପମ୍ପ ନେଇ ହଳ କରିବା ପାଇଁ ଯାଇଥିଲେ। ଅପରାହ୍ନରେ ହଳ କରୁଥିବା ସମୟରେ ହଠାତ ବିଜୁଳି ଘଡଘଡି ସହିତ ବର୍ଷା ହୋଇଥିଲା। ବାପା ପୁଅ ତରତର ହୋଇ ପାୱାରଟିଲରକୁ ବିଲରୁ ଉପରକୁ ଉଠାଇ ଦେଇ ଘରକୁ ଆସୁଥିଲେ। ପିତାମ୍ବର ମହାନ୍ତ ପାଣି ପମ୍ପକୁ ଧରି ନିଜର ବାଇକ ସାହାର୍ଯ୍ୟରେ ଆସୁଥିବା ସମୟରେ ବଜ୍ରପାତ ହେବା ଫଳରେ ଘଟଣାସ୍ଥଳରେ ହିଁ ସେ ମୃତ୍ୟୁ ବରଣ କରିଥିବା ବେଳେ ପିତାମ୍ବରଙ୍କ ପୁଅ ଝସକେତନ ଟିକିଏ ଦୂରରେ ରହିଥିବାରୁ ସେ ଗୁରୁତର ଆହତ ହୋଇଛନ୍ତି। ବର୍ଷା ଛାଡିବା ପରେ ଗ୍ରାମବାସୀ ତୁରନ୍ତ ଝସକେତନକୁ ପ୍ରଥମେ ଝୁମ୍ପୁରା ଡାକ୍ତରଖାନାକୁ ଚିକିତ୍ସା ପାଇଁ ଆଣିଥିଲେ କିନ୍ତୁ ଅବସ୍ଥା ଗୁରୁତ୍ୱର ଥିବାରୁ ଡାକ୍ତରଖାନା କର୍ତ୍ତୃପକ୍ଷ ଜିଲାମୁଖ୍ୟ ଚିକିତ୍ସାଳୟକୁ ଅଧିକ ଚିକିତ୍ସା ନିମନ୍ତେ ପଠାଇ ଦେଇଛନ୍ତି।
Comments are closed.