ବେଗୁନିଆ ତହସିଲଦାର ପୃଥ୍ୱୀରାଜ ମଣ୍ଡଳଙ୍କ ସୁପାରିଶ କ୍ରମେ ଉପଜିଲ୍ଲାପାଳ ଅଶୋକ କୁମାର ବେହୁରିଆ ବେଗୁନିଆ ବ୍ଲକ ଅନ୍ତର୍ଗତ ରାଉତପଡା ,ଗଡମାଣତୀର ଏବଂ ଶଗଡ଼ଭଙ୍ଗା ପଞ୍ଚାୟତର ୩ ଟି ଗ୍ରାମକୁ ଅଣୁ ଆବଦ୍ଧାଞ୍ଚଳ ଘୋଷଣା କରିଛନ୍ତି। ରାଉତପଡା ପଞ୍ଚାୟତର କୋତଳାଙ୍ଗ ଗ୍ରାମରେ ଜଣେ ସଂକ୍ରମିତ ଚିହ୍ନଟ ହେବା ପରେ ୫ ଟି ପରିବାରର ୪୦ ଲୋକ ବସବାସ କରୁଥିବା କୋତଳାଙ୍ଗ ଗ୍ରାମର ହନୁମାନ ମନ୍ଦିର ଠାରୁ ନୀଳକଣ୍ଠ ପାତ୍ରଙ୍କ ଘର ପର୍ଯ୍ୟନ୍ତ, ଗଡମାଣତୀର ପଞ୍ଚାୟତର ବାଲିବେରେଣି ଗ୍ରାମରେ ୮ ଜଣ ସଂକ୍ରମିତ ଚିହ୍ନଟ ହେବା ପରେ ୩ ଟି ପରିବାରର ୧୬ ଜଣ ଲୋକ ବସ ବାସ କରୁଥିବା ଉଷାମଣି ବେହେରାଙ୍କ ଘର ଠାରୁ ପ୍ରଭାକର ବେହେରାଙ୍କ ଘର ପର୍ଯ୍ୟନ୍ତ ଏବଂ ଶଗଡ଼ଭଙ୍ଗା ପଞ୍ଚାୟତର ଶଗଡ଼ଭଙ୍ଗା ଗ୍ରାମରେ ୫ ଜଣ ସଂକ୍ରମିତ ଚିହ୍ନଟ ହେବା ପରେ ୬୦ ଟି ପରିବାରର ୨୪୦ ଲୋକ ବସବାସ କରୁଥିବା ଗୌରାଙ୍ଗ ନାୟକଙ୍କ ଘର ଠାରୁ ଭାଗବତ ଟୁଙ୍ଗି ପର୍ଯ୍ୟନ୍ତ ୧୬ ତାରିଖ ସନ୍ଧ୍ୟା ୭ ଟାରୁ ୨୨ ତାରିଖ ରାତି ୯ଟା ପର୍ଯ୍ୟନ୍ତ ଅଣୁ ଆବଦ୍ଧାଞ୍ଚଳ ଘୋଷଣା କରାଯାଇଛି ।
ଏହି ସମୟ ମଧ୍ୟରେ ସମ୍ପୃକ୍ତ ଅଂଚଳରେ ବାହାର ଲୋକଙ୍କ ପ୍ରବେଶ ଉପରେ କଟକଣା ଲଗାଯାଇଛି ।ସମ୍ପୃକ୍ତ ଗ୍ରାମର କୌଣସି ବ୍ୟକ୍ତି ବାହାରକୁ ବାହାରିବା ଉପରେ ମଧ୍ୟ କଟକଣା ଲଗାଯାଇଛି। ଏହି ସମୟ ମଧ୍ୟରେ ସମ୍ପୃକ୍ତ ଅଞ୍ଚଳକୁ ବିଶୋଧନ କରାଯିବା ସହ ସଂକ୍ରମିତଙ୍କ ସଂସ୍ପର୍ଶରେ ଆସିଥିବା ବ୍ୟକ୍ତିଙ୍କୁ ଚିହ୍ନଟ କରାଯିବ। ନୋଡାଲ ଅଧିକାରୀ ଭାବେ ୬ଟି ବିଭାଗର ସରକାରୀ କର୍ମଚାରୀଙ୍କୁ ସେଠାରେ ବିଭିନ୍ନ କାର୍ଯ୍ୟ କରିବା ପାଇଁ ଉପଜିଲ୍ଲାପାଳ ନିର୍ଦେଶ ଦେଇଥିବାବେଳେ ମଣ୍ଡଳ ଉନ୍ନୟନ ଅଧିକାରୀଙ୍କୁ ସମସ୍ତ କାର୍ଯ୍ୟର ତଦାରଖ ଦାୟିତ୍ୱ ଦେଇଛନ୍ତି । ଏହା ପୂର୍ବରୁ ବେଗୁନିଆ ବ୍ଲକର ୩୩ ଟି ସ୍ଥାନକୁ ଅଣୁ ଆବଦ୍ଧାଞ୍ଚଳ ଭାବେ ଘୋଷଣା କରାଯାଇଥିଲା। ଆଜିର ଏହି ଘୋଷଣା ପରେ ୩୬ ଟି ସ୍ଥାନକୁ ଅଣୁ ଆବଦ୍ଧାଞ୍ଚଳ ଭାବେ ଘୋଷଣା କରାଗଲା।
