ନୂଆଦିଲ୍ଲୀ: ବାୟୋଲୋଜିକାଲ-ଇ କମ୍ପାନୀର ଆରବିଡି ପ୍ରୋଟିନ ସବ୍-ୟୁନିଟ ଟିକା କୋର୍ବେଭାକ୍ସ ଭାରତୀୟ ବଜାର ପାଇଁ ସବୁଠାରୁ ଶସ୍ତା ଟିକା ହେବ ବୋଲି କୁହାଯାଉଛି। ଏହାକୁ ବ୍ୟବହାର ନିମନ୍ତେ ଜରୁରୀକାଳୀନ ଅନୁମୋଦନ ମିଳିବା ପରେ ଏହି ଟିକା ବଜାରକୁ ଆସିବ। ଏହାର ମୂଲ୍ୟ ସମ୍ପର୍କରେ ପ୍ରକାଶକରି ନ୍ୟାସନାଲ ସ୍କୁଲ ଅଫ ଟ୍ରପିକାଲ ମେଡିସିନ (ଏନଏସଟିଏମ)ର ସହଯୋଗୀ ଡିନ୍ ଡ. ମାରିଆ ଏଲିନା ବୋଟ୍ଟାଜି କହିଛନ୍ତି, କୋର୍ବେଭାକ୍ସକୁ ହେପାଟାଇଟିସ ବି ଟିକା ଅନୁଯାୟୀ ପ୍ରସ୍ତୁତ କରାଯାଇଛି ଏବଂ ଏଥିରେ ପାରମ୍ପରିକ ପ୍ରଯୁକ୍ତିର ବ୍ୟବହାର କରାଯାଇଛି। ଏହାର ପାନ ପିଛା ମୂଲ୍ୟ ପ୍ରାୟ ୧୧୦ ଟଙ୍କା ରହିବ। ଏପରିକି ଏହାର ଦୁଇପାନ ନେଲେ ସର୍ବାଧିକ ୪୦୦ ଟଙ୍କା କିମ୍ବା ତାହାଠାରୁ କମ୍ ପଡିବ। ଅନ୍ୟପକ୍ଷରେ ସେରମ୍ ଇନଷ୍ଟିଚ୍ୟୁଟର ଟିକା ପ୍ରତି ପାନ ମୂଲ୍ୟ ରାଜ୍ୟ ସରକାରଙ୍କ ପାଇଁ ୩୦୦ ଟଙ୍କା, ଘରୋଇ ଡାକ୍ତରଖାନା ପାଇଁ ୬୦୦ ଟଙ୍କା ରଖାଯାଇଛି। ସେହିଭଳି ଭାରତ ବାୟୋଟେକର କୋଭାକ୍ସିନ ମୂଲ୍ୟ ପାନ ପିଛା ଯଥାକ୍ରମେ ୪୦୦ ଟଙ୍କା ଓ ୧୨୦୦ ଟଙ୍କାରେ ବିକ୍ରି କରାଯାଉଛି। ରୁଷିଆ ଟିକା ସ୍ପଟନିକ ଭି ମୂଲ୍ୟ ପାନ ପିଛା ୯୯୫ ଟଙ୍କା ରହିଛି। ଇତିମଧ୍ୟରେ କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରଣାଳୟ ବାୟୋଲୋଜିକାଲ-ଇ କମ୍ପାନୀକୁ ଅଗ୍ରୀମ ୧୫୦୦ କୋଟି ଟଙ୍କା ଦିଆଯାଇ ଏହାକୁ ୩୦ କୋଟି ଟିକା ସଂରକ୍ଷିତ ରଖିବାକୁ କୁହାଯାଇଛି। ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ପରୀକ୍ଷଣ ସମୟରେ କୋର୍ବେଭାକ୍ସ ଟିକାରୁ ଆଶାନୁରୂପ ଫଳାଫଳ ମିଳିଥିବା ଜଣାଯାଇଛି। ସଂପ୍ରତି ଏହାର ତୃତୀୟ ପର୍ଯ୍ୟାୟ ପରୀକ୍ଷଣ ଚାଲିଛି।
Popular Categories
Previous article
Next article