ଆର୍ଥିକ ଅଭିବୃଦ୍ଧିକୁ ସମର୍ଥନ କରିବା ଉଦ୍ଦେଶ୍ୟରେ ଷ୍ଟେଟ ବ୍ୟାଙ୍କ ଅଫ୍ ଇଣ୍ଡିଆ (ଏସବିଆଇ) ସୁଧ ହାରକୁ ଯଥାସମ୍ଭବ ସ୍ଥିର ରଖିବାକୁ ଚେଷ୍ଟା କରିବ ବୋଲି ଏହାର ଅଧ୍ୟକ୍ଷ ଦୀନେଶ କୁମାର ଖରା କହିଛନ୍ତି। ସେ କହିଛନ୍ତି, କରୋନା ସଂକ୍ରମଣର ଦ୍ଵିତୀୟ ପ୍ରଭାବକୁ ଦୃଷ୍ଟିରେ ରଖି ଦେଶର କିଛି ଅଂଶରେ ଲକଡାଉନ୍ ଜାରି ହୋଇ ଥିବାରୁ, ବ୍ୟାଙ୍କର ଅନାଦେୟ ଋଣର ବ୍ୟାଙ୍କିଙ୍ଗ କ୍ଷେତ୍ର ଉପରେ କେଉଁଭଳି ପ୍ରଭାବ ପଡିବ ତାହା ଆକଳନ କରିବାକୁ ଅପେକ୍ଷା କରିବାକୁ ପଡିବ।
ଶ୍ରୀ ଖରା କହିଛନ୍ତି, ଯେହେତୁ ମୁଦ୍ରାସ୍ଫୀତି ପରିବର୍ତ୍ତିତ ସୁଧ ହାର ଉପରେ ପ୍ରଭାବ ପକାଇଥାଏ ସେ କ୍ଷେତ୍ରରେ ବିକାଶମୂଳକ ପଦକ୍ଷେପକୁ ସମର୍ଥନ କରିବା ନିମନ୍ତେ ଯଥା ସମ୍ଭବ ସୁଧ ହାର ସ୍ଥିର ରଖିବାକୁ ଚେଷ୍ଟା କରାଯିବ। ସମ୍ୱାଦ ସରବରାହ ସଂସ୍ଥା ପିଟିଆଇକୁ ଏକ ସାକ୍ଷାତକାର ଅବସରରେ ସେ କହିଛନ୍ତି, ଆଗାମୀ ଦିନରେ ସୁଧ ହାର ସ୍ଥିତି କଣ ରହିବ ତାହା ଏବେ ଠାରୁ ଆକଳନ କରିବା ସମ୍ଭବ ନୁହେଁ।
ଲକଡାଉନର ପ୍ରଭାବ ପ୍ରତ୍ୟେକ ରାଜ୍ୟରେ ଭିନ୍ନ ଭିନ୍ନ ହୋଇଥିବାରୁ ଆଗାମୀ ଦିନରେ ଏହାର ଅର୍ଥନୀତି ଉପରେ କଣ ପ୍ରଭାବ ରହିବ ଏବଂ ଅନାଦେୟ ଋଣ ସ୍ଥିତି କଣ ରହିବ ତାହା ଏବେ ଠାରୁ ଆକଳନ ନ କରି ଅପେକ୍ଷା କରିବା ଠିକ ହେବ ବୋଲି ସେ କହିଛନ୍ତି। ଦେଶର ସର୍ବ ବୃହତ ଋଣ ପ୍ରଦାନକାରୀ ଷ୍ଟେଟ ବ୍ୟାଙ୍କ ପକ୍ଷରୁ ନିଆଯାଉଥିବା ବିଭିନ୍ନ ପଦକ୍ଷେପ ବିଷୟରେ ଶ୍ରୀ ଖରା କହିଛନ୍ତି ଯେ କରୋନା ପ୍ରଭାବିତ କେତେକ ରାଜ୍ୟରେ କୋଭିଡ -୧୯ ରୋଗୀଙ୍କ ପାଇଁ ଆଇସିୟୁ ସୁବିଧା ଥିବା ମେକିଫିଟ୍ ଡାକ୍ତରଖାନା ସ୍ଥାପନ କରିବାକୁ ଏସବିଆଇ ନିଷ୍ପତ୍ତି ନେଇଛି।
ଷ୍ଟେଟ ବ୍ୟାଙ୍କ ପୂର୍ବରୁ ୩୦ କୋଟି ଟଙ୍କା ବ୍ୟୟ କରି କୋଭିଡ ରୋଗୀଙ୍କ ଚିକିତ୍ସା ପାଇଁ ଜରୁରୀକାଳୀନ ଭିତ୍ତିରେ ଚିକିତ୍ସା ସୁବିଧା ସ୍ଥାପନ ପାଇଁ ଅଣ-ସରକାରୀ ସଂଗଠନ ଏବଂ ଡାକ୍ତରଖାନା ପରିଚାଳନା ସହ ଜଡିତ ରହିଛି। ଅତ୍ୟଧିକ ସଂକ୍ରମଣ ପ୍ରଭାବିତ ରାଜ୍ୟଗୁଡ଼ିକରେ ଏସବିଆଇ ୧ ହଜାର ଶଯ୍ୟା ଓ ୫୦ଟି ଆଇସିୟୁ ବ୍ୟବସ୍ଥା ଥିବା ହସ୍ପିଟାଲ ସ୍ଥାପନ କରିବାକୁ ନିଷ୍ପତ୍ତି ନେଇଥିବା ସେ କହିଛନ୍ତି।
