ଭୁବନେଶ୍ବର: ସୀମା ସୁରକ୍ଷା ବଳର ମହାନିର୍ଦ୍ଦେଶକ (ଡି.ଜି) ଶ୍ରୀ ରାକେଶ ଆସ୍ଥାନାଙ୍କ ଓଡିଶା ଗସ୍ତ ଅବସରରେ ବୁଧବାର ଭୁବନେଶ୍ୱର ଠାରେ ବାମପନ୍ଥୀ ସନ୍ତ୍ରାସବାଦ ଉପରେ ଏକ ଉଚ୍ଚସ୍ତରୀୟ ବୈଠକ ଅନୁଷ୍ଠିତ ହୋଇଥିଲା । ଏହି ବୈଠକରେ ରାଜ୍ୟ ଆରକ୍ଷୀ ମହାନିର୍ଦ୍ଦେଶକ ଶ୍ରୀ ଅଭୟ, ବି.ଏସ୍.ଏଫର ଅତିରିକ୍ତ ମହନିର୍ଦ୍ଦେଶକ (ଅପରେସନ୍), ରାଜ୍ୟ ଗୁଇନ୍ଦା ନିର୍ଦ୍ଦେଶକ ଏବଂ ରାଜ୍ୟ ପୁଲିସ ଓ ବି.ଏସ୍.ଏଫ୍ ର ବରିଷ୍ଠ ଅଧିକାରୀମାନେ ଉପସ୍ଥିତ ଥିଲେ।
ଏହ ବୈଠକରେ ମୁଖ୍ୟତଃ ରାଜ୍ୟରେ ବର୍ତ୍ତମାନ ବାମପନ୍ଥୀ ସନ୍ତ୍ରାସବାଦର ସ୍ଥିତି, ବିଶେଷ ଭାବରେ ଯେଉଁ ଅଞ୍ଚଳରେ ବି.ଏସ୍.ଏଫ୍ କମ୍ପାନୀ କାର୍ଯ୍ୟ କରୁଛି ସେ ଅଞ୍ଚଳରେ ପରିସ୍ଥିତି କିପରି ଅଛି, ନକ୍ସଲ ଉପଦ୍ରବକୁ ରୋକିବାରେ ନିଆଯାଇଥିବା କାର୍ଯ୍ୟକ୍ରମର ଅଗ୍ରଗତି, ମାଓଦମନ ପାଇଁ ନିଆଯାଉଥିବା ରଣକୌଶଳ, କିଛି ସଂବେଦନଶୀଳ ଅଞ୍ଚଳରେ ବି.ଏସ୍.ଏଫ୍ ବଳର ପୁନଃ ମୁତୟନ ଏବଂ ରାଜ୍ୟ ପୁଲିସ ଓ ବି.ଏସ୍.ଏଫ୍ ମଧ୍ୟରେ ଉତ୍ତମ ସମନ୍ୱୟ ରକ୍ଷା ଆଦି ପ୍ରସଙ୍ଗ ଉପରେ ବିଷଦ ଭାବରେ ଆଲୋଚନା କରାଯାଇଥିଲା । ରାଜ୍ୟ ପୁଲିସ ଓ ସୀମା ସୁରକ୍ଷାବଳ ଉଭୟ ମିଳିତ ଭାବରେ ରାଜ୍ୟରେ ବାମପନ୍ଥୀ ସନ୍ତ୍ରାସବାଦକୁ ପ୍ରତିହତ କରିବାକୁ ଦୃଢତାର ସହ କାର୍ଯ୍ୟ କରିବେ ବୋଲି ସଂକଳ୍ପ ନେଇଥିଲ।
Comments are closed.