ପ୍ୟାରିସ: ଋଣ ଜାଲିଆତିରେ ସଂପୃକ୍ତ ଓ ଦେଶରୁ ପଳାୟନ କରିଥିବା ମଦ ସମ୍ରାଟ ବିଜୟ ମାଲ୍ୟାଙ୍କ ଫ୍ରାନ୍ସରେ ଥିବା ସମ୍ପତି ଜବତ କରିଛି ପ୍ରବର୍ତନ ନିର୍ଦେଶାଳୟ । ଏହାର ମୂଲ୍ୟ ୧.୬ ନିୟୁତ ୟୁରୋ ହେବ ବୋଲି ଆକଳନ କରାଯାଇଛି । ଭାରତୀୟ ମୁଦ୍ରାରେ ଏହାର ମୂଲ୍ୟ ୧୪ କୋଟି ଟଙ୍କାରୁ ଅଧିକ ହେବ । ପ୍ରବର୍ତନ ନିର୍ଦେଶାଳୟର ଅନୁରୋଧ କ୍ରମେ ଫ୍ରାନ୍ସ କର୍ତ୍ତୃପକ୍ଷଙ୍କ ଦ୍ବାରା ପ୍ୟାରିସରେ ଥିବା ୩୨ ଆଭେନ୍ୟୁ FOCH ରେ ଅବସ୍ଥିତ ବିଜୟ ମାଲ୍ୟାଙ୍କ ସମ୍ପତ୍ତି ଜବତ ହୋଇଥିବା ସୂଚନା ମିଳିଛି ।
ସମ୍ପ୍ରତି ମନି ଲଣ୍ଡରିଂ ଆକ୍ଟ ୨୦୦୨ ଅନୁସାରେ କିଙ୍ଗଫିସର ଏୟାର ଲାଇନ୍ସ, ବିଜୟ ମାଲ୍ୟା ଓ ଅନ୍ୟମାନଙ୍କ ବିରୋଧରେ ସିବିଆଇ ଓ ପ୍ରବର୍ତନ ନିର୍ଦେଶାଳୟ ମାମଲା ରୁଜୁ କରିଛି ଓ ତଦନ୍ତ ଆରମ୍ଭ ହୋଇଛି । ୨୦୧୬ ମସିହାରୁ ଏହି ତଦନ୍ତ ଚାଲିଛି। ବିଜୟ ମାଲ୍ୟାଙ୍କ ଉପରେ ପ୍ରାୟ ୧୦ ହଜାର କୋଟି ଟଙ୍କା ଠକେଇ ଅଭିଯୋଗ ହୋଇଛି । ବର୍ତମାନ ୧୧୨୩୧ କୋଟି ଟଙ୍କାର ସମ୍ପତ୍ତି ପ୍ରବର୍ତନ ନିର୍ଦେଶାଳୟ ଜବତ କରି ସାରିଲାଣି ।
ଅନ୍ୟପକ୍ଷରେ ଅଭିଯୁକ୍ତ ବିଜୟ ମାଲ୍ୟାଙ୍କୁ ପଳାତକ ଅର୍ଥନୈତିକ ଅପରାଧୀ ବୋଲି ଘୋଷଣା କରିବାକୁ ନିର୍ଦ୍ଧାରିତ କୋର୍ଟରେ ଏକ ଆବେଦନ ମଧ୍ୟ କରାଯାଇଥିଲା। ସ୍ପେଶାଲ କୋର୍ଟ (FEO ଆକ୍ଟ), ମୁମ୍ବାଇ ଗତ ୨୦୧୯ ଜାନୁଆରୀ ମାସରେ ତାଙ୍କୁ ଅର୍ଥନୈତିକ ଅପରାଧୀ ଓ ପଳାତକ ଭାବରେ ଘୋଷଣା କରିଛି ।
ବିଜୟ ମାଲ୍ୟାଙ୍କ ପ୍ରତ୍ୟର୍ପଣ ଲାଗି ବ୍ରିଟେନ୍ ସରକାରଙ୍କୁ ଭାରତ ସରକାର ଅନୁରୋଧ କରିଛନ୍ତି । ପଶ୍ଚିମବଙ୍ଗର ମାଜିଷ୍ଟ୍ରେଟ କୋର୍ଟ୨୦୧୮ ଡ଼ିସେମ୍ବର ମାସରେ ମନି ଲଣ୍ଡରିଂ ଅଭିଯୋଗରେ ବିଜୟ ମାଲ୍ୟାଙ୍କ ପ୍ରତ୍ୟର୍ପଣ ପାଇଁ ରାୟ ଦେଇଛନ୍ତି। ଏହା ବିରୋଧରେ ବିଜୟ ମାଲ୍ୟା ବ୍ରିଟେନ ହାଇକୋର୍ଟ ଏବଂ ପରେ ସୁପ୍ରିମକୋର୍ଟରେ ବିଜୟ ମାଲ୍ୟାଙ୍କ ଆବେଦନକୁ ପ୍ରତ୍ୟାଖ୍ୟାନ କରି ଦେଇଛନ୍ତି ।
