ବ୍ୟାଙ୍କରୁ ସାଧାରଣ ଲୋକଟିଏ ଋଣ ପାଇବା କଷ୍ଟ । ଏପରିକି ସୁନା ବନ୍ଧକ ଦେଇ ଋଣ ମିଳିବା ବି ସହଜ ନୁହେଁ । ମାତ୍ର ଗୁଜରାଟରେ ଏମିତି ଏକ ଘଟଣା ଘଟିଛି, ଯାହା ବ୍ୟାଙ୍କ କର୍ତ୍ତୃପକ୍ଷ ଓ ପୁଲିସକୁ ଆଶ୍ଚର୍ଯ୍ୟ କରିଛି । ୩୦ ଜଣ ଗ୍ରାହକ ନକଲି ସୁନା ଦେଇ ୪୧ ଥର ଋଣ ନେଇ ଯାଇଥିବା ସୂଚନା ମିଳିଛି । ଏବେ ଘଟଣାର ତଦନ୍ତ କ୍ରାଇମବ୍ରାଞ୍ଚକୁ ଦିଆଯାଇଛି । ଅବଶ୍ୟ ଏହି ଘଟଣାରେ ବିଶାଲ ଭରୱାଡ଼ ନାମକ ଜଣେ ବ୍ୟକ୍ତିକୁ ଗିରଫ କରିବାକୁ କ୍ରାଇମବ୍ରାଞ୍ଚ ସକ୍ଷମ ହୋଇଛି ।
ଘଟଣା ଘଟିଛି ଆଇସିଆଇସିଆଇ ବ୍ୟାଙ୍କ । ବ୍ୟାଙ୍କ ମାସିକ ଅଡ଼ିଟ୍ ସମୟରେ ଜଣେ ବ୍ୟକ୍ତି ବ୍ୟାଙ୍କର ବିଭିନ୍ନ ଶାଖାରେ ସୁନା ବନ୍ଧକ ଦେଇ ଋଣ ନେଇଥିବା ଜଣା ପଡ଼ିବା ପରେ ଘଣ୍ଟାଚକଟା ଆରମ୍ଭ ହୋଇଥିଲା । ବିଶାଲ ଭରୱାଡ଼ ନାମକ ଏହି ବ୍ୟକ୍ତି ଗତ ଅଗଷ୍ଟ ୧୦ ତାରିଖରୁ ସେପ୍ଟେମ୍ବର ୯ ତାରିଖ ମଧ୍ୟରେ ୩ଟି ବ୍ୟାଙ୍କରେ ସୁନା ବନ୍ଧକ ଦେଇ ଋଣ ନେଇଥିବାବେଳେ ଯେତେଜଣ ସୁନା ବନ୍ଧକ ଦେଇ ଋଣ ନେଇଥିଲେ ସମସ୍ତଙ୍କ ଯାଞ୍ଚ ଆରମ୍ଭ ହୋଇଥିଲା । ଯାଞ୍ଚ ବେଳେ ବିଶାଳ ନିଜର ସହଯୋଗୀମାନଙ୍କ ଜରିଆରେ ସୁନା ଦେଇ ପ୍ରାୟ ୪୧ଥର ଋଣ ନେଇଛି ଓ ଏହାର ପରିମାଣ ପ୍ରାୟ ୨.୫୫ କୋଟି ଟଙ୍କା ହେବ । ପ୍ରାୟ ୧୦ଟି ଶାଖାରୁ ଏହି ଋଣ ନିଆଯାଇଥିଲା । ଏହାପରେ ବ୍ୟାଙ୍କ କର୍ତ୍ତୃପକ୍ଷ ବନ୍ଧକ ରଖିଥିବା ସୁନାର ଯାଞ୍ଚ ଆରମ୍ଭ କଲେ । ସେତେବେଳେ ଏହି ସୁନା ସବୁ ନକଲି ଥିବା ଜଣାପଡ଼ିଲା । ଏହାକୁ ନେଇ ଋଣ ଦେଇଥିବା ବ୍ୟାଙ୍କ କର୍ତ୍ତୃପକ୍ଷ ମଧ୍ୟ କ୍ରାଇମବ୍ରାଞ୍ଚ ସନ୍ଦେହ ପରିସରକୁ ଆସିଛନ୍ତି । ପୁଲିସ ଓ କ୍ରାଇମବ୍ରାଞ୍ଚ ଘଟଣାର ଅନୁସନ୍ଧାନ ଆରମ୍ଭ କରିଛି ।
Comments are closed.