ଲକ୍ଷ୍ନୌ: ଉତ୍ତରପ୍ରଦେଶର ହାଥରସ ଗଣଦୁଷ୍କର୍ମ ଘଟଣାକୁ ନେଇ ସାରା ଦେଶରେ ଆକ୍ରୋଶର ସ୍ଥିତି ରହିଥିବା ବେଳେ ବଳରାମପୁରରୁ ଆଉ ଏକ ଦୁଷ୍କର୍ମ ଘଟଣା ସାମ୍ନାକୁ ଆସିଛି । କଲେଜରେ ଆଡମିଶନ ପାଇଁ ଯାଇଥିବା ଜଣେ ଜଣେ ୨୨ ବର୍ଷିୟ ଯୁବତୀଙ୍କୁ ଅପହରଣ କରିନେଇ ଗଣଦୁଷ୍କର୍ମ କରାଯାଇଛି । ପୀଡ଼ିତା ଯୁବତୀଙ୍କୁ ସଙ୍କଟାପନ୍ନ ଅବସ୍ଥା ମେଡିକାଲ ନେବା ସମୟରେ ତାଙ୍କର ମୃତ୍ୟୁ ହୋଇଥିବା ଜଣାପଡିଛି। ପୁଲିସ ଏହି ଘଟଣାରେ ଏକ ମାମଲା ରୁଜୁ କରିବା ସହ ଦୁଇ ଜଣ ଅଭିଯୁକ୍ତଙ୍କୁ ଗିରଫ କରିଛି ।
ସୂଚନାଅନୁସାରେ ମଙ୍ଗଳବାର ଦିନ ବଳରାମପୁର ଜିଲା କୋତାବାଲି ତହସିଲ ଅନ୍ତର୍ଗତ ଗୌସେଡି ଗାଁ ଜଣେ ୨୨ ବର୍ଷିୟ ଯୁବତୀ କଲେଜରେ ଆଡମିଶନ ପାଇଁ ଯାଇଥିଲେ । ଏହି ସମୟରେ ତାଙ୍କୁ ଅଭିଯୁକ୍ତମାନେ ଅପହରଣ କରିନେଇ ତାଙ୍କ ସହ ଗଣଦୁଷ୍କର୍ମ କରିଥିଲେ । କଲେଜରେ ଆଡମିଶନ ପାଇଁ ଯାଇଥିବା ଝିଅ ସନ୍ଧ୍ୟା ପର୍ଯ୍ୟନ୍ତ ଘରକୁ ନ ଫେରିବାରୁ ଘର ଲୋକ ତାଙ୍କୁ ଫୋନ୍ କରିଥିଲେ ମାତ୍ର ତାଙ୍କ ଫୋନ୍ ସୁଇଚଅଫ୍ ଥିଲା । ଏହାପରେ ପରିବାର ଲୋକ ଝିଅକୁ ଖୋଜା ଖୋଜି କରିବା ଆରମ୍ଭ କରିଥିଲେ । କିନ୍ତୁ ପ୍ରାୟ ସନ୍ଧ୍ୟା ୭ଟା ସମୟରେ ଜଣେ ରିକ୍ସା ଚାଳକ ତାଙ୍କ ଝିଅକୁ ବେହୋସ ଅବସ୍ଥାରେ ଆଣିଥିଲେ । ସେତେବେଳେ ତାଙ୍କ ଝିଅର ଅବସ୍ଥା ସଙ୍କଟାପନ୍ନ ରହିଥିଲା । ସେହି ସମୟରେ ସେ କିଛି କହି ପାରୁନଥିଲେ । ଝିଅର ସଙ୍କଟାପନ୍ନ ଅବସ୍ଥା ଦେଖି ପରିବାର ଲୋକ ଝିଅକୁ ସ୍ଥାନୀୟ ଏକ ମେଡିକାଲ ନେଇଥିଲେ। ମାତ୍ର ସେଠାରେ ଡାକ୍ତର ତାଙ୍କର ସଙ୍କଟାପନ୍ନ ଅବସ୍ଥା ଦେଖି ଲକ୍ଷ୍ନୌ ନେବା ପାଇଁ କହିଥିଲେ । ପରିବାରଲୋକଙ୍କ ଝିଅକୁ ଅନ୍ୟ ମେଡିକାଲକୁ ନେବା ରାସ୍ତାରେ ତାଙ୍କର ମୃତ୍ୟୁ ହୋଇଯାଇଥିଲା ।
