ନୂଆଦିଲ୍ଲୀ : ଆନ୍ତର୍ଜାତିକ ସ୍ତରରେ କୋଭିଡ ମୃତ୍ୟୁହାର ୩. ୨ ପ୍ରତିଶତ ଥିବାବେଳେ ଭାରତରେ ଏହା ୧.୬୫% ରହିଛି। ଦେଶରେ ଚିକିତ୍ସିତ ହେଉଥିବା ସଂକ୍ରମିତ ମାନଙ୍କ ମଧ୍ୟରୁ ୦.୫ ଭାଗ ଲୋକଙ୍କୁ ଭେଣ୍ଟିଲେଟର ଆବଶ୍ୟକ ପଡୁଛି ଓ ୧ ପ୍ରତିଶତରୁ କମ୍ ଲୋକଙ୍କୁ ଆଇସିୟୁରେ ରଖାଯାଇଛି। କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରୀ ଡକ୍ଟର ହର୍ଷବର୍ଦ୍ଧନ ସୋମବାର ଲୋକସଭାରେ କୋଭିଡ ସଂକ୍ରାନ୍ତରେ ଏକ ବିବୃତ୍ତି ଦେଇ ଏହା କହିଛନ୍ତି।
ମନ୍ତ୍ରୀ କହିଛନ୍ତି ସମଗ୍ର ଦେଶ ଐକ୍ୟବଦ୍ଧ ହୋଇ ପ୍ରଭାବଶାଳୀ ଢ଼ଙ୍ଗରେ କୋଭିଡ-୧୯ର ମୁକାବିଲା କରୁଛି। ଭାରତ କୋଭିଡ-୧୯କୁ ନିୟନ୍ତ୍ରଣ ରଖିବାରେ ସକ୍ଷମ ହୋଇଛି। ସେ କହିଛନ୍ତି ସରକାରଙ୍କ ଦ୍ୱାରା ଆଗୁଆ ପଦକ୍ଷେପ ଯୋଗୁଁ ଦେଶରେ ପ୍ରତି ୧୦ଲକ୍ଷ ଲୋକରେ ୩ ହଜାର ଲୋକ ସଂକ୍ରମିତ ହୋଇଛନ୍ତି। ସ୍ୱାସ୍ଥ୍ୟମନ୍ତ୍ରୀ କହିଛନ୍ତି ମନ୍ତ୍ରୀମାନଙ୍କର ଗୋଷ୍ଠୀ ଓ ଆଉ ୧୧ଟି କ୍ଷମତାପନ୍ନ ଗୋଷ୍ଠୀ ଦ୍ୱାରା ଠିକ୍ ସମୟରେ ପଦକ୍ଷେପ ଗ୍ରହଣ ଓ କ୍ୟାବିନେଟ୍ ସଚିବଙ୍କ ଦ୍ୱାରା ସମୀକ୍ଷା ଯୋଗୁଁ ଚିକିତ୍ସା ସମ୍ବନ୍ଧୀୟ ନିଷ୍ପତ୍ତି, ପୃଥକୀକରଣ, ନମୂନା ପରୀକ୍ଷା ଓ ଅନ୍ୟାନ୍ୟ ପଦକ୍ଷେପ ସଂକ୍ରାନ୍ତରେ ଦ୍ରୁତ ନିଷ୍ପତ୍ତି ନିଆଯାଇପାରିଛି।
