ଫୁଲବାଣୀ/ଖଜୁରିପଡ଼ା: ବଳି ଦେବା ଉଦ୍ଦେଶ୍ୟରେ ଶୁକ୍ରବାର ୨ ଜଣ ଶିଶୁଙ୍କୁ ଅପହରଣ ଉଦ୍ୟମ କରାଯାଉଥିବା ବେଳେ ଗ୍ରାମବାସୀଙ୍କ ଦ୍ୱାରା ତାହା ପଣ୍ଡ ହୋଇଯାଇଥିବା ଜଣା ପଡିଛି। ଏନେଇ ଖଜୁରିପଡା ଥାନାରେ ଅଭିଯୋଗ ପରେ ପୁଲିସ ମାମଲା ରୁଜୁ କରି ଜଣକୁ ଅଟକ ରଖି ତଦନ୍ତ ଜାରି ରଖିଛି।
ଥାନାଧିକାରୀ ରମାକାନ୍ତ ପାତ୍ରଙ୍କ ସୂଚନା ଅନୁଯାୟୀ, ଖଜୁରିପଡା ଥାନା ଅନ୍ତର୍ଗତ ବଲସକୁମ୍ପା ପଞ୍ଚାୟତର ବୁରୁପଦା ଗ୍ରାମର ସୁରେନ୍ଦ୍ର କହଁରଙ୍କର ଏକ ନାବାଳକ ପୁଅ ଏବଂ ବିଷ୍ଣୁପ୍ରିୟା କହଁରଙ୍କ ଏକ ନାବାଳକ ପୁତ୍ର ଗାଁ ଦାଣ୍ଡରେ ଖେଳୁଥିବା ବେଳେ ଦୁଇ ଜଣ ବ୍ୟକ୍ତି ସେମାନଙ୍କୁ ଟେକି ନେଇ ଏକ କାରରେ ବସାଇ ନେଇ ଯିବାକୁ ଉଦ୍ୟମ କରିଥିଲେ। ଏହି ସମୟରେ ପିଲା ଦୁଇ ଜଣ ପାଟି କରିବାରୁ ନିକଟରେ ଥିବା ଗ୍ରାମବାସୀ ଆସି ଯିବାରୁ ସେମାନେ ପିଲା ଦୁଇ ଜଣଙ୍କୁ ଛାଡି ଚାଲି ଯାଇଥିଲେ। ଉକ୍ତ ଦୁଇ ବ୍ୟକ୍ତିଙ୍କ ସହ ପୂର୍ବରୁ ଗ୍ରାମର ଜଣେ ବ୍ୟକ୍ତି ବୁଲୁଥିବାର ଗ୍ରାମବାସୀ ଦେଖିଥିଲେ। ତେଣୁ ସେହି ଲୋକକୁ ଗ୍ରାମବାସୀ ଧରି ଜେରା କରିବାରୁ ଉକ୍ତ ଦୁଇ ବ୍ୟକ୍ତି ଶିଶୁ ଦୁଇ ଜଣଙ୍କୁ ବଳି ଦେବା ଉଦ୍ଦେଶ୍ୟରେ ନେଉଥିଲେ ବୋଲି ସ୍ୱୀକାର କରିଥିଲୋ ଗ୍ରାମବାସୀମାନେ ଉକ୍ତ ବ୍ୟକ୍ତିକୁ ଗ୍ରାମରେ ଏକ ଗଛରେ ବାନ୍ଧି ରଖିବା ସହିତ ଘଟଣା ସମ୍ପର୍କରେ ଖଜୁରିପଡ଼ା ପୁଲିସକୁ ଖବର ଦେଇଥିଲୋ ଖବର ପାଇ ପୁଲିସ ଉକ୍ତ ଗ୍ରାମରେ ପହଞ୍ଚିବା ପରେ ବାନ୍ଧି ରଖାଯାଇଥିବା ବ୍ୟକ୍ତିକୁ ଗ୍ରାମବାସୀମାନେ ପୁଲିସକୁ ହସ୍ତାନ୍ତର କରିବା ସହ ସୁରେନ୍ଦ୍ର ଓ ବିଷ୍ଣୁପ୍ରିୟା ମିଳିତ ଭାବେ ଥାନାରେ ଏନେଇ ଏତଲା ଦେଇଛନ୍ତି। ଏତଲା ପ୍ରକାରେ ପୁଲିସ୍ କେସ ନଂ ୬୬ା୨୦ରେ ଏକ ମାମଲା ରୁଜୁ କରି ଉକ୍ତ ଲୋକକୁ ଅଟକ ରଖି ତଦନ୍ତ କରୁଥିବା ଥାନାଧିକାରୀ ରମାକାନ୍ତ ପାତ୍ର ସୂଚନା ଦେଇଛନ୍ତି।
