ଜୟପୁର: ରାଜସ୍ଥାନ ଉପମୁଖ୍ୟମନ୍ତ୍ରୀ ପଦ ଏବଂ ପିସିସି ସଭାପତି ପଦରୁ ବରିଷ୍ଠ କଂଗ୍ରେସ ନେତା ସଚିନ ପାଇଲଟକୁ ବହିଷ୍କାର କରାଯିବା ପରେ ସେ ତାଙ୍କ ପ୍ରତିକ୍ରିୟା ରଖିଛନ୍ତି। ସଚିନ କହିଛନ୍ତି, ସତ୍ୟକୁ କିଛି ସମୟ ପାଇଁ ହଇରାଣ କରାଯାଇପାରେ, କିନ୍ତୁ ପରାଜିତ କରାଯାଇ ପାରିବ ନାହିଁ। ସଚିନ ସରକାରଙ୍କ ବିରୋଧରେ ବିଦ୍ରୋହ ଆରମ୍ଭ କରିବା ପରେ ମଙ୍ଗଳବାର ବିଧାୟକ ଦଳ ବୈଠକରେ ନିଷ୍ପତ୍ତି ଅନୁସାରେ ତାଙ୍କୁ ମନ୍ତ୍ରିମଣ୍ଡଳ ସମେତ ଦଳର ରାଜ୍ୟ ସଭାପତି ପଦରୁ ବାହାର କରିଦିଆଯାଇଛି। ଅନ୍ୟପଟେ କଂଗ୍ରେସ ମହାସଚିବ ପ୍ରିୟଙ୍କା ଗାନ୍ଧୀ ଭଦ୍ରା ଦଳର ଅଧ୍ୟକ୍ଷା ସୋନିଆ ଗାନ୍ଧୀଙ୍କୁ ଭେଟିବା ଲାଗି ୧୦ ଜନପଥସ୍ଥିତ ବାସଭବନରେ ପହଞ୍ଚିଛନ୍ତି। ରାଜସ୍ଥାନରେ ଦେଖାଦେଇଥିବା ରାଜନୈତିକ ସଙ୍କଟ ପ୍ରସଙ୍ଗରେ ସେ ସୋନିଆଙ୍କ ସହ ଆଲୋଚନା କରି କିଛି ନିଷ୍ପତ୍ତି ନେଇପାରନ୍ତି ବୋଲି କୁହାଯାଉଛି।
ସେହିପରି ସଚିନଙ୍କୁ ବହିଷ୍କାର କରାଯିବା ପରେ ଜୟପୁରସ୍ଥିତ କଂଗ୍ରେସ ମୁଖ୍ୟାଳୟରୁ ତାଙ୍କ ନାମଫଳକକୁ ହଟାଇ ଦିଆଯାଇଛି। ସୂଚନାଯୋଗ୍ୟ, ସଚିନଙ୍କ ସ୍ଥାନରେ ଗୋବିନ୍ଦ ସିଂହଙ୍କୁ ରାଜସ୍ଥାନ ପିସିସି ମୁଖ୍ୟ ଭାବେ ନିଯୁକ୍ତ କରାଯାଇଛି।
