ନୂଆଦିଲ୍ଲୀ : ଦୀର୍ଘ ୬୦ ଦିନର ମୁହାଁମୁହିଁ ପରିସ୍ଥିତି ପରେ ସୋମବାର ଗଲୱାନ ଉପତ୍ୟକାରୁ ଚୀନ ସେନା ପଛକୁ ହଟିଥିଲେ ମଧ୍ୟ ଅବିଶ୍ବାସର ବାତାବରଣ ଦୂର ହୋଇ ନାହିଁ। ଚୀନ ଉପରେ ଭାରତ ବିଶ୍ବାସ କରିପାରୁ ନ ଥିବାରୁ ପୁନର୍ବାର ଏଲଏସିକୁ ସୈନ୍ୟ ଓ ଅସ୍ତ୍ରଶସ୍ତ୍ର ପ୍ରେରଣ କରିଛି। ସୋମବାର ସୀମାନ୍ତରେ ଭାରତ ଚୀନର ସମ୍ଭାବ୍ୟ ମୁକାବିଲା ପାଇଁ ସଶସ୍ତ୍ର ସାମରିକ ଯାନ ଓ ଅଧିକ ସୈନ୍ୟ ମୁତୟନ କରିଛି। ଏଗୁଡ଼ିକୁ ଦାରବୁକ-ଶ୍ୟୋକ-ଦଉଲତ ବେଗ୍ ଓଲ୍ଡି ସଡ଼କ ନିକଟରେ ମୁତୟନ କରାଯାଇଛି। ଚୀନ ପ୍ରଥମ ଥର ପାଇଁ ଦୁଇ ଦିନ ପୂର୍ବେ ଅଧିକ ୫ହଜାର ସୈନ୍ୟ ପଠାଇଥିବା ସ୍ବୀକାର କରିବା ପରେ ହୁଏତ ଭାରତ ଏଭଳି ପଦକ୍ଷେପ ନେଇଥିବା ସୂଚନା ମିଳିଛି। ଏହି ସଶସ୍ତ୍ର ସାମରିକ ଯାନରୁ ଟ୍ୟାଙ୍କ ବିଧ୍ବଂଶୀ କ୍ଷେପଣାସ୍ତ୍ର ଓ ରକେଟ ନିକ୍ଷେପ ସହିତ ଗୋଳା ବର୍ଷଣ କରାଯାଇପାରିବ। ଏତଦ୍ବ୍ୟତୀତ ଶତ୍ରୁ ଆକ୍ରମଣରୁ ରକ୍ଷା ପୂର୍ବକ ନିଜ ଭିତରେ ସୈନ୍ୟଙ୍କୁ ସୁରକ୍ଷିତ ଭାବେ ଧରି ଆକ୍ରମଣ ଜାରି ରଖିପାରିବ। ମେସିନ ଗନ୍ ଭାବେ ମଧ୍ୟ ଏହା ବ୍ୟବହାର ହୋଇପାରିବ। ଏହି ଯାନ ମଧ୍ୟରେ ରହିଛି ଶରତ ବିଏମ୍ପି-୨; ଯାହା ସମ୍ପ୍ରତି ଭାରତର ସର୍ବାଧୁନିକ ଯୁଦ୍ଧ ଯାନ। ଏହା ଯୁଦ୍ଧ କ୍ଷେତ୍ରରେ ଘଣ୍ଟା ପ୍ରତି ପ୍ରାୟ ୬୫କିମି ବେଗରେ ଗତି କରିପାରେ। ପାଣି ଉପରେ ମଧ୍ୟ ଗତିକରିବା କ୍ଷମତା ସହ ଯେକୌଣସି ରାସ୍ତାରେ ଗଡ଼ିବାର ଦକ୍ଷତା ରଖିଛି। ଲଦାଖରେ ମୁତୟନ ଥିବା ଭାରତର ୩୦ହଜାର ସୈନ୍ୟଙ୍କୁ ଏହା ସହାୟତା ପ୍ରଦାନ କରିବ।
Popular Categories
Previous article
Next article