ନୂଆଦିଲ୍ଲୀ: ସାମାଜିକ ଗଣମାଧ୍ୟମର ନିୟନ୍ତ୍ରଣ ସମ୍ବନ୍ଧୀୟ ସମସ୍ତ ମାମଲାକୁ ହାଇକୋର୍ଟଗୁଡ଼ିକରୁ ନିଜ ଅଧୀନକୁ ଆଣିବା ପାଇଁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ଫେସ୍ବୁକ୍ ଓ ହ୍ୱାଟସ୍ ଆପ୍ ଦ୍ୱାରା କରାଯାଇଥିବା ସ୍ଥାନାନ୍ତରଣ ପିଟିସନ୍ ଉପରେ ସୁପ୍ରିମକୋର୍ଟ ଏହି ନିର୍ଦ୍ଦେଶ ଦେଇଛନ୍ତି। ସୁପ୍ରିମକୋର୍ଟକୁ ମାମଲା ସ୍ଥାନାନ୍ତରଣକୁ ତାମିଲନାଡୁ ବିରୋଧ କରୁନାହିଁ ବୋଲି କୋର୍ଟଙ୍କୁ ଜଣାଇଛି।
ସାମାଜିକ ଗଣମାଧ୍ୟମ ଓ ହ୍ୱାଟସ୍ଆପ୍ ସହ ଆଧାର ସଂଯୋଗ ସମ୍ବନ୍ଧୀୟ ମାମଲା ମାଡ୍ରାସ୍ ହାଇକୋର୍ଟରେ ପଡ଼ି ରହିଛି। ସାମାଜିକ ଗଣମାଧ୍ୟମଗୁଡ଼ିକୁ ଅଧିକ ଉତ୍ତରଦାୟୀ କରିବା ବିଷୟକୁ ଚୂଡ଼ାନ୍ତ କରିବା ଲାଗି କେନ୍ଦ୍ର ସରକାର ଆସନ୍ତାବର୍ଷ ଜାନୁଆରୀ ୧୫ ତାରିଖ ପର୍ଯ୍ୟନ୍ତ ସମୟ ମାଗିଛନ୍ତି। ସୁପ୍ରିମକୋର୍ଟ ପରବର୍ତ୍ତୀ ଶୁଣାଣି ପାଇଁ ୨୦୨୦ ଜାନୁଆରୀ ମାସ ଶେଷ ସପ୍ତାହକୁ ସମୟ ଧାର୍ଯ୍ୟ କରିଛନ୍ତି।
