ଗୋଦାବରୀ: ଆନ୍ଧ୍ରପ୍ରଦେଶର ଗୋଦାବରୀ ଜିଲାରେ ମଙ୍ଗଳବାର ଏକ ପର୍ଯ୍ୟଟକ ବସ୍ ଦୁର୍ଘଟଣାଗ୍ରସ୍ତ ହୋଇଛି। ମରେଡୁମଲ୍ଲିରୁ ଛତିଶଗଡ ଚିନ୍ତୁରୁ ଯାଉଥିବା ପର୍ଯ୍ୟଟକ ବସ୍ ଓଲଟି ୮ ଜଣ ଯାତ୍ରୀଙ୍କ ମୃତ୍ୟୁ ହୋଇଛି। ଏଥିରେ ୩ରୁ ଅଧିକ ଯାତ୍ରୀ ଗୁରୁତର ହୋଇଥିବା ବେଳେ ଅନେକ ଆହତ ହୋଇଥିବା ସୂଚନା ମିଳିଛି।
ମିଳିଥିବା ସୂଚନା ଅନୁଯାୟୀ, ପର୍ଯ୍ୟଟକ ବସଟି ରାଜମହେନ୍ଦ୍ରି ଠାରୁ ୪୦ କିମି ଦୂରରେ ଥିବା ପର୍ଯ୍ୟଟନ ସ୍ଥଳ ମରେଡୁମଲ୍ଲି ରୁ ଛତିଶଗଡ ସୀମାନ୍ତ ଆଦିବାସୀବହୁଳ ଅଞ୍ଚଳ ଚିନ୍ତୁରୁ କୁ ଯାଉଥିଲା। ଏହି ସମୟରେ ବାଲ୍ମିକି କୋଣ୍ଡା ନିକଟରେ ସଂକୀର୍ଣ୍ଣ ଖାଲଢିପ ଘାଟି ରାସ୍ତାରେ ବସଟି ବୁଲାଣି ନେଉଥିବା ବେଳେ ଭାରସାମ୍ୟ ହରାଇ ୬୦ ଫୁଟ୍ ତଳକୁ ଓଲଟି ପଡିଥିଲା। ବସରେ ୨୦ରୁ ୨୫ ଜଣ ଯାତ୍ରୀ ଥିବା ବେଳେ ସେମାନଙ୍କ ମଧ୍ୟରୁ ଘଟଣାସ୍ଥଳରେ ୮ ଜଣଙ୍କ ମୃତ୍ୟୁ ହୋଇଛି। ସେଠାରୁ ୩ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି। ସେମାନଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡିଛି। ବସଟି ଦ୍ରୁତ ଗତିରେ ଯାଉଥିବା କାରଣରୁ ବ୍ରେକ୍ ଫେଲ ହୋଇ ଦୁର୍ଘଟଣାଗ୍ରସ୍ତ ହୋଇଥିବା ପୁଲିସ ସନ୍ଦେହ କରୁଛି।
