୬ ବର୍ଷର ନାବାଳକଙ୍କୁ ଅପହରଣ ପରେ ଦୁଷ୍କର୍ମ, ଅଭିଯୁକ୍ତଙ୍କୁ ସୁରକ୍ଷା ଦେଉଥିବା ପୁଲିସକୁ ମାଡ଼

ସମାଜ ଡିଜିଟାଲ ଡେସ୍କ: ରାଜଧାନୀ ନୂଆଦିଲ୍ଲୀରେ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଜଣେ ୬ ବର୍ଷର ନାବାଳକଙ୍କୁ ଅପହରଣ ପରେ ଦୁଷ୍କର୍ମ କରାଯାଇଛି। ଏଭଳି ଜଘନ୍ୟ କାଣ୍ଡ ଘଟାଇଛି ପୀଡ଼ିତ ନାବାଳକର ଜଣେ ପଡ଼ୋଶୀ। ଏହାକୁ ନେଇ ଦକ୍ଷିଣ ପୂର୍ବ ଦିଲ୍ଲୀର ଗୋବିନ୍ଦପୁରୀ ଅଞ୍ଚଳରେ ଉତ୍ତେଜନା ଲାଗିରହିଥିବାବେଳେ ଉତ୍ତ୍ୟକ୍ତ ଲୋକେ ଅଭିଯୁକ୍ତକୁ ସୁରକ୍ଷା ଦେବାକୁ ଯାଇଥିବା ପୁଲିସକୁ ବି ମାଡ଼ ମାରିଛନ୍ତି।

ସେପ୍ଟେମ୍ବର ୧ତାରିଖର ଘଟଣା। ଗୋବିନ୍ଦପୁରୀ ଅଞ୍ଚଳର ଜଣେ ୬ ବର୍ଷର ନାବାଳକଙ୍କୁ ଅପହରଣ କରିନିଆଯାଇଥିବା ସମ୍ପର୍କରେ ଥାନାରେ ଅଭିଯୋଗ ହୋଇଥିଲା। ଏହାପରେ ପୁଲିସ ନାବାଳକଙ୍କୁ ଖୋଜିବା ଆରମ୍ଭ କରିଥିଲା। ପରେ ନାବାଳକଙ୍କୁ ଉଦ୍ଧାର କରି ଶିଶୁ ମଙ୍ଗଳ କମିଟି(ସିଡବ୍ଲ୍ୟୁସି)କୁ ହସ୍ତାନ୍ତର କରିଥିଲା। ତେବେ ସେପ୍ଟେମ୍ବର ୩ରେ ପୁଲିସ କଂଟ୍ରୋଲ ରୁମକୁ ଏକ ଫୋନ ଯାଇଥିଲା। ଉଦ୍ଧାର କରାଯାଇଥିବା ନାବାଳକଙ୍କୁ ଦୁଷ୍କର୍ମ କରାଯାଇଥିବା ନେଇ ସନ୍ଧ୍ୟା ୭ଟା ୩୦ରେ ପରିବାର ଲୋକେ ଫୋନ କରି ଜଣାଇଥିଲେ। ପଡ଼ୋଶୀ ଏହି ଘଟଣାର ଅଭିଯୁକ୍ତ ହୋଇଥିବାରୁ ସ୍ଥାନୀୟ ଲୋକେ ତାଙ୍କୁ ଅଟକ ରଖି ମାଡ଼ ମାରିଥିଲେ। ଖବରପାଇ ପୁଲିସ ପହଞ୍ଚି ଅଭିଯୁକ୍ତକୁ ସୁରକ୍ଷା ଦେବା ସହିତ ତା’କୁ ଉଦ୍ଧାର କରିବାକୁ ଉଦ୍ୟମ କରିଥିଲା। ଏଥିରେ ସ୍ଥାନୀୟ ଲୋକେ ଉତକ୍ଷିପ୍ତ ହୋଇ ପୁଲିସକୁ ନିର୍ଧୂମ ମାଡ଼ ମାରିଥିଲେ। କିଛି ମହିଳା ମଧ୍ୟ ପୁଲିସକୁ ମାଡ଼ ମାରିଥିଲେ। ହେଲେ ପୁଲିସ ସେଠାରୁ ଅଭିଯୁକ୍ତକୁ ଧରି ପଳାଇ ଆସିଥିଲା। ପରେ ସ୍ଥାନୀୟ ଲୋକେ ଥାନା ଆଗରେ ପହଞ୍ଚି ବିକ୍ଷୋଭ କରିଥିଲେ।