ପାରଳାଖେମୁଣ୍ଡି: ଗଜପତି ଜିଲ୍ଲା ଅବକାରୀ ବିଭାଗ ପାଟ୍ରୋଲିଂ ସମୟରେ ମଙ୍ଗଳବାର ଏକ କଣ୍ଟେନର ସହ ବିପୁଳ ପରିମାଣର ଗଞ୍ଜେଇ ଜବତ କରିଛି। ଚଳଚ୍ଚିତ୍ର ଶୈଳୀରେ ଏହି ଗଞ୍ଜେଇ ଚୋରା ଚାଲାଣ ପ୍ରସ୍ତୁତି ଚାଲିଥିବା ବେଳେ ମାଡିବସିଥିଲା ସଦର ଅବକାରୀ ବିଭାଗର ପ୍ରଶନ୍ନ ପଟେଲଙ୍କ ନେତୃତ୍ବରେ ଗଠିତ ଟିମ୍। ଏହି ଘଟଣାରେ ୨ ଅଭିଯୁକ୍ତଙ୍କୁ ଗିରଫ କରାଯାଇଛି।
ଗୋଷାଣି ବ୍ଲକ ଅନ୍ତର୍ଗତ ଲାବାଣ୍ୟଗଡର ଏକ ପାହାଡ ନିକଟରେ ଠିଆ ହୋଇଥିବା କଣ୍ଟେନରକୁ ଦେଖି ପାଟ୍ରୋଲିଂ ଟିମ୍ ପହଞ୍ଚିଥିଲା। ସେଠାରେ ଗଞ୍ଜେଇ ଗୁଡିକୁ ମେସିନ ମାଧ୍ୟମରେ ଭର୍ତ୍ତି କରାଯାଇ ଛୋଟିଆ ଛୋଟିଆ ପକେଟରେ ପରିବର୍ତ୍ତନ କରାଯାଇଥିଲା । ତେବେ ଠିଆ ହେବା ଅବସ୍ଥାରେ ଥିବା କଣ୍ଟେନରରେ ଗୁପ୍ତ କୋଠରୀ କରାଯାଇ ସେଥିରେ ଗଞ୍ଜେଇ ପୁଡିଆ ଗୁଡିକୁ ରଖାଯାଉଥିଲା । ଠିଆ ହୋଇଥିବା କଣ୍ଟେନରକୁ କାବୁ କରି ଅବକାରୀ ବିଭାଗ ଜବତ କରିଥିଲା । ଉକ୍ତ କଣ୍ଟେନରରୁ ୪ କୁଇଣ୍ଟାଲରୁ ଅଧିକ ଗଞ୍ଜେଇ ଜବତ ହୋଇଛି, ଯାହାର ଆନୁମାନିକ ବଜାର ମୂଲ୍ୟ ୪୦ ଲକ୍ଷ ୫୧ ହଜାର ଟଙ୍କା ହେବ।
ଉକ୍ତ ଗଞ୍ଜେଇ ଚୋରା ଚାଲାଣରେ ବ୍ୟବହୃତ କଣ୍ଟେନରକୁ ଜବତ କରାଯିବା ସହିତ ଦୁଇ ଜଣଙ୍କୁ ଗିରଫ କରାଯାଇଛି। ଗିରଫ ଅଭିଯୁକ୍ତମାନେ ରାୟଗଡ ବ୍ଲକ ଜିରାଙ୍ଗ ନଦୀ ସାହିର ସମେଶୁ ଲିମା (୨୦) ଓ ଆର୍.ଉଦୟଗିରି ବ୍ଲକ ବାଦପୁର ଗ୍ରାମର ଯୋଥାମ୍ ଲିମା (୩୧) । ଏନେଇ ସଦର ଅବକାରୀ ଥାନାରେ ମାମଲା ରୁଜୁ କରାଯାଇ ଉଭୟ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି।
