ଚାନ୍ଦବାଲି: ଭଦ୍ରକ ଜିଲ୍ଲା ଚାନ୍ଦବାଲି ଥାନା ମତୋ ଫାଣ୍ଡି ଅନ୍ତର୍ଗତ ମାଧପୁର ପଞ୍ଚାୟତ ବଙ୍ଗାଳୀପଡ଼ାରେ କୁକୁଡା ଫାର୍ମ ମାଲିକ ଅଜୟ ଗିରିଙ୍କୁ ହତ୍ୟା ମାମଲାରେ ପୁଲିସ ଦୁଇ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ଶୁଭ୍ରାଂଶୁ ସ୍ଵାଇଁ ଏବଂ କିଶୋର ପଣ୍ଡା। ଅଜୟଙ୍କୁ ତାଙ୍କ ସହଯୋଗୀ ଶୁଭ୍ରାଂଶୁ ଫାର୍ମ କର୍ମଚାରୀ କିଶୋରଙ୍କ ସହିତ ମିଶି ହତ୍ୟା କରିଥିବା ଶୁକ୍ରବାର ଚାନ୍ଦବାଲି ଥାନା ପରିସରରେ ଏକ ସାମ୍ବାଦିକ ସମ୍ମିଳନୀ କରି ସ୍ପଷ୍ଟ କରିଛି ପୁଲିସ। ବିବାଦ ଏବଂ ଟଙ୍କା ପାଇଁ ଏହି ହତ୍ୟାକାଣ୍ଡ ଘଟିଥିବା ପୁଲିସ କହିଛି।
ସୂଚନା ମୁତାବକ, ଭଦ୍ରକ ଚରମ୍ପା ଅଞ୍ଚଳର ଅଜୟ ଓ କେନ୍ଦ୍ରାପଡା ଅଞ୍ଚଳର ଶୁଭ୍ରାଂଶୁ ମିଶି ଚାନ୍ଦବାଲି ବ୍ଲକ ବଙ୍ଗାଳୀପଡ଼ା ଅଞ୍ଚଳରେ କୁକୁଡ଼ା ଫାର୍ମ କରିଥିଲେ। ଗତ ୧୨ ତାରିଖ ରାତିରେ କୌଣସି କାରଣକୁ ନେଇ ଶୁଭ୍ରାଂଶୁ ତାଙ୍କ ସହଯୋଗୀ ଅଜୟଙ୍କୁ ହତ୍ୟା କରିଥିବା ଥାନାରେ ଅଭିଯୋଗ ହୋଇଥିଲା। ପରେ ପୁଲିସ ତଦନ୍ତ ଆରମ୍ଭ କରିଥିଲା। ତଦନ୍ତ ପରେ ପ୍ରକୃତ ସତ୍ୟ ସାମ୍ନାକୁ ଆସିବା ସହିତ ଏହି ଘଟଣାରେ ଶୁଭ୍ରାଂଶୁଙ୍କ ହାତ ଥିବା ଜାଣିବାକୁ ପାଇଥିଲା ପୁଲିସ। ଶୁଭ୍ରାଂଶୁ ଲୁହା ରଡରେ ଅଜୟଙ୍କୁ ପିଟି ହତ୍ୟା କରିଥିଲେ। ଏଥିରେ ସହଯୋଗ କରିଥିଲେ କିଶୋର। ହେଲେ ଅଜୟଙ୍କ ମୃତ୍ୟୁ ପରେ ତାହାକୁ ଦୁର୍ଘଟଣାର ରୂପ ଦିଆଯାଇଥିଲା। ସିସିଟିଭି ସଜାଡୁଥିବା ସମୟରେ ଅଜୟ ଖଟ ଉପରୁ ଖସିପଡ଼ି ପ୍ରାଣ ହରାଇଥିବା ଅଭିଯୁକ୍ତମାନେ କହିଥିଲେ। ଏହି ହତ୍ୟା କାଣ୍ଡରେ ଆଉ କିଏ ସମ୍ପୃକ୍ତ ଅଛନ୍ତି କି ନାହିଁ ସେ ଦିଗରେ ତଦନ୍ତ ଚାଲିଥିବା ଅତିରିକ୍ତ ଏସପି ଅରୁପ ଅଭିଷେକ ବେହେରା କହିଛନ୍ତି।
