ଦୀର୍ଘ ୧୨ ଘଣ୍ଟା ପରେ ଭିସୁଟ୍‌‌ ଛାତ୍ରୀଙ୍କ ମୃତଦେହ ଉଦ୍ଧାର

ସମ୍ବଲପୁର : ପିସି ବ୍ରିଜରୁ ଡେଇଁ ନିଖୋଜ ଭିସୁଟ୍‌‌ ଛାତ୍ରୀ ଚିନ୍ମୟୀ ପ୍ରିୟଦର୍ଶିନି ସାହୁଙ୍କ ମୃତଦେହ ବୁଧବାର ଉଦ୍ଧାର ହୋଇଛି। ଦୀର୍ଘ ୧୨ ଘଣ୍ଟା ପରେ ବୁର୍ଲା ପାୱାର ଚାନେଲ ନିକଟରୁ ମୃତଦେହ ଉଦ୍ଧାର ହୋଇଛି। ଅନେକ ଖୋଜାଖୋଜି କରିବା ପରେ ଅଗ୍ନିଶମ ବାହିନୀ ମୃତଦେହ ଉଦ୍ଧାର କରିଛନ୍ତି। ଗତକାଲି ପୁରୁଷ ବନ୍ଧୁଙ୍କ ଉପସ୍ଥିତିରେ ପିସି ବ୍ରିଜରୁ ଛାତ୍ରୀ ଜଣଙ୍କ ଡେଇଁ ପଡିଥିଲେ। ସମାବର୍ତ୍ତନ ଉତ୍ସବକୁ ଆସିଥିବା ବେଳେ ସେଠାରୁ ଯିବା ସମୟରେ ଡେଇଁ ପଡିଥିଲେ। କେଉଁ କାରଣରୁ ଏଭଳି ଅଘଟଣ ଘଟିଛି ସେନେଇ କୌଣସି ସ୍ପଷ୍ଟତା ମିଳିନଥିବା ବେଳେ ପୁଲିସ ତଦନ୍ତ ଆରମ୍ଭ କରିଛି।

ସୂଚନା ଯୋଗ୍ୟ, ଅଗ୍ନିଶମ ବାହିନୀଙ୍କ ଦ୍ୱାରା ବୁର୍ଲା ଅଠର ହଜାର ନିକଟ ସାଇଫୋନରୁ ମୃତଦେହ ଉଦ୍ଧାର କରାଯାଇଛି। ଗତକାଲି ରାତି ୯ ଟାରୁ ନିଖୋଜ ଥିଲେ ଭିସୁଟର ପୂର୍ବତନ ଛାତ୍ରୀ ଚିନ୍ମୟୀ। ତେବେ ପରିବାର ବର୍ଗ ହତ୍ୟା ଅଭିଯୋଗ ଆଣିଛନ୍ତି।। ଗତକାଲି ଚିନ୍ମୟୀ ଅଘଟଣ ଘଟିବା ପୂର୍ବରୁ ପରିବାର ବର୍ଗଙ୍କୁ ଫୋନ୍ କରିଥିଲେ। ଫୋନ୍ କରିବା ସମୟରେ କେହି ବେକ୍ ଚିପିଥିବା ଫଳରେ ସେ କଥା ହୋଇ ପାରି ନ ଥିଲେ ବୋଲି ପରିବାର ବର୍ଗ ଅଭିଯୋଗ ଆଣିଛନ୍ତି।