ଇସଲାମାବାଦ : ଜାମ୍ମୁ ସହରସ୍ଥିତ ସୁଞ୍ଜ୍ୱାନ ସେନା ଶିବିର ଉପରେ ଆତଙ୍କବାଦୀ ଆକ୍ରମଣ ପରେ ପାକିସ୍ତାନକୁ ଏବେ ସର୍ଜିକାଲ ଷ୍ଟ୍ରାଇକ ଭୟ ବିବ୍ରତ କରିବାରେ ଲାଗିଛି । ସେନା ଶିବିର ଉପରେ ଘଟିଥିବା ଆକ୍ରମଣ ପାଇଁ ଭାରତ ପାକିସ୍ତାନ ସ୍ଥିିତ ଆତଙ୍କବାଦୀ ସଂଗଠନ ଜୈସ-ଇ-ମହମ୍ମଦକୁ ଦାୟୀ କରିଛି । ଉରି ଆତଙ୍କବାଦୀ ଆକ୍ରମଣ ଘଟଣା ପରେ ଭାରତ ଯେପରି ନିୟନ୍ତ୍ରଣ ରେଖା ପାର କରି ସର୍ଜିକାଲ ଷ୍ଟ୍ରାଇକକୁ ରୂପରେଖ ଦେଇଥିଲା ସେହିଭଳି ଏଥର ବି କରିବ ବୋଲି ପାକିସ୍ତାନ ଆଶଙ୍କା କରୁଛି । ତେଣୁ ଭାରତ କୌଣସି ପଦକ୍ଷେପ ନେବା ପୂର୍ବରୁ ସର୍ଜିକାଲ ଷ୍ଟ୍ରାଇକ କଥା ନଭାବିବାକୁ ପାକିସ୍ତାନ ଚେତବାନୀ ଦେଇଛି। ଏହାସହ ଭାରତର ସମସ୍ତ ଅଭିଯୋଗକୁ ପାକିସ୍ତାନ ଖଣ୍ଡନ କରିଛି। ପାକିସ୍ତାନ ବିଦେଶ ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ଭାରତ ସବୁଥର କୌଣସି ଯାଞ୍ଚ ନକରି ଦାୟିତ୍ୱହୀନ ମନ୍ତବ୍ୟ ଦେଉଛି ଓ ଭିତ୍ତିହନୀ ଅଭିଯୋଗ ଲଗାଉଛି । କାଶ୍ମୀରରେ ଚାଲିଥିବା ସଶସ୍ତ୍ର ଆନ୍ଦୋଳନର ନିୟନ୍ତ୍ରଣ ପାଇଁ କ୍ରୁରପନ୍ଥା ଆପଣା ଯାଉଥିବାବେଳେ ଏହା ଉପରେ ଧ୍ୟାନ ହଟାଇବାକୁ ଭାରତ ଏପରି ଅଭିଯୋଗ ଲଗାଉଛି । ପ୍ରକାଶ ଯେ ଏହି ଆକ୍ରମଣରେ ୫ ଜଣ ଯବାନ ସହିଦ ହୋଇଥିବାବେଳେ ୪ ଜଣ ଆତଙ୍କବାଦୀ ନିପାତ ହୋଇଛନ୍ତି। ଏହାବ୍ୟତୀତ ଜଣେ ବେସାମରିକ ବ୍ୟକ୍ତି ପ୍ରାଣ ହରାଇଥିବାବେଳେ ୧୧ ଜଣ ଆହତ ହୋଇଛନ୍ତି। ମୃତ ଆତଙ୍କବାଦୀଙ୍କଠାରୁ ଏକେ-୫୬ ରାଇଫଲ, ହାତବୋମା ଓ ଅନ୍ୟାନ୍ୟ ଅସ୍ତ୍ରଶସ୍ତ୍ର ଉଦ୍ଧାର କରାଯାଇଛି। ଏହି ଆତଙ୍କବାଦୀ ଆକ୍ରମଣ ପାଇଁ ପାକିସ୍ତାସ୍ଥିତ ଆତଙ୍କବାଦୀ ସଂଗଠନ ଜୈସ-ଇ-ମହମ୍ମଦକୁ ଦାୟୀ କରାଯାଇଛି ।
