ମୁମ୍ବଇ : ବାହୁବଳୀର ଦେବସେନା ଚରିତ୍ରରେ ଅବତୀର୍ଣ୍ଣ ହୋଇ ବଲିଉଡରେ ମଧ୍ୟ ନିଜ ପରିଚୟକୁ ଦୃଢ଼ କରାଇଥିଲେ ଦକ୍ଷିଣଜଗତର ଅଭିନେତ୍ରୀ ଅନୁଷ୍କା ସେଟ୍ଟି। ୩୭ ବର୍ଷୀୟା ଅନୁଷ୍କା କେବେ ବିବାହ କରିବେ ବୋଲି ସମସ୍ତଙ୍କର ପ୍ରଶ୍ନ। ନିକଟରେ ନିଜ ଜନ୍ମଦିନକୁ ଖୁବ୍ ଜାକଜମକରେ ପାଳିଥିବା ଅନୁଷ୍କା ବିବାହ ପ୍ରସଙ୍ଗରେ ମୁହଁ ଖୋଲିଛନ୍ତି। ବାହୁବଳୀ ପ୍ରଭାସଙ୍କ ତାଙ୍କ ଘନିଷ୍ଠତାକୁ ସମ୍ପୂର୍ଣ୍ଣ ଅସ୍ବୀକାର କରିଛନ୍ତି ସେ। ଅନ୍ୟପାଖେ ତାଙ୍କ ମା’ ଝିଅର ବିବାହ ପାଇଁ ସବୁଠୁ ଅଧିକ ବ୍ୟତିବ୍ୟସ୍ତ ବୋଲି କହିଛନ୍ତି ଅନୁଷ୍କା। ମା’ଙ୍କୁ ମଧ୍ୟ ସେ ବୁଝାଇଛନ୍ତି, ଯଥା ସମୟରେ ତାଙ୍କ ବିବାହ ହେବ। ଏଣୁ ଏଥିପାଇଁ ଏତେଟା ବ୍ୟଗ୍ର ହେବା ଅନୁଚିତ। ସେ ଯେତେବେଳେ ୨୧ ବର୍ଷ ବୟସର ହୋଇଥିଲେ, ତାଙ୍କର ପ୍ରଥମ ବିବାହ ପ୍ରସ୍ତାବ ଆସିଥିଲା। ସେସମୟରେ ତାଙ୍କ ବାପା ଏଇ ପ୍ରସ୍ତାବ ପାଇଁ ରାଜି ହୋଇନଥିଲେ। ବାପାଙ୍କର ଗେହ୍ଲୀ ଝିଅ ହେଲେ ଅନୁଷ୍କା। ବାପାଙ୍କ ଆଖିରେ ସେ ଏବେ ବି କୁନିଝିଅ ବୋଲି କଥା ପ୍ରସଙ୍ଗରେ କହିଛନ୍ତି ଏଇ ଦକ୍ଷିଣଜଗତର ସୁପରହିଟ୍ ଅଭିନେତ୍ରୀ। ଅନୁଷ୍କାଙ୍କର ଘନିଷ୍ଠ ବାନ୍ଧବୀଙ୍କ ଗଣମାଧ୍ୟମକୁ କହିଛନ୍ତି, ପ୍ରଭାସଙ୍କ ସହ ହିଁ ଅନୁଷ୍କା ବିବାହ ବନ୍ଧନରେ ବାନ୍ଧି ହେବେ। ଦୁହେଁ କାହିଁକି ଏଇ ସମ୍ପର୍କକୁ ଲୁଚାଉଛନ୍ତି, ତାହା ସମସ୍ତଙ୍କୁ ଅଜ୍ଞାତ।
