ଭୁବନେଶ୍ବର: ବିଧାୟକ ପଦରୁ କଂଗ୍ରେସର ଦୁଇଜଣ ସଦସ୍ୟ ନବ ଦାସ ଓ ଯୋଗେଶ ସିଂହ ଇସ୍ତଫା ଦେବା ପରେ ବିଧାନସଭାରେ ସଂଖ୍ୟା ଦୃଷ୍ଟିରୁ ବିରୋଧୀ ଦଳ ନେତା ପଦକୁ ନେଇ ଆଶଙ୍କା ସୃଷ୍ଟି ହୋଇଥିବାବେଳେ ବାଚସ୍ପତି ଏହାର ପରୀକ୍ଷା ନିରୀକ୍ଷା କରୁଥିଲେ। ପଞ୍ଚଦଶ ବିଧାନସଭାରେ ବିରୋଧୀ ଦଳ ନେତା ମାନ୍ୟତା ପାଇଥିବା ଶ୍ରୀ ମିଶ୍ର ନିଜ ଆଡୁ ଦଳ ସଦସ୍ୟଙ୍କ ସଂଖ୍ୟା ହ୍ରାସ ପାଇଥିବାରୁ ବିଧି ବ୍ୟବସ୍ଥା ଅନୁଯାୟୀ ତାଙ୍କୁ ମିଳୁଥିବା ସରକାରୀ ସୁବିଧା ସୁଯୋଗ ଫେରାଇନେବାକୁ ବାଚସ୍ପତିଙ୍କୁ ଚିଠି ଲେଖି ଅନୁରୋଧ କରିଛନ୍ତି। ତେବେ ବାଚସ୍ପତି ଏହା ଉପରେ କୌଣସି ନିଷ୍ପତ୍ତି ଶୁଣାଇ ନାହାନ୍ତି।
ପଞ୍ଚଦଶ ବିଧାନସଭାକୁ କଂଗ୍ରେସର ୧୬ଜଣ ସଦସ୍ୟ ନିର୍ବାଚିତ ହୋଇଥିଲେ। ୧୪୭ ଆସନ ବିଶିଷ୍ଟ ବିଧାନସଭାରେ ଏକ ଦଶମାଂଶରୁ ଅଧିକ ସଦସ୍ୟ ଥିବା ସର୍ବ ବୃହତ ବିରୋଧୀ ଦଳର ନେତା ଭାବେ ନରସିଂହ ମିଶ୍ରଙ୍କୁ ମାନ୍ୟତା ମିଳିଥିଲା।
