ନୂଆଦିଲ୍ଲୀ: ନିର୍ବାଚନ ପରେ ସାମ୍ପ୍ରଦାୟିକ ହିଂସାର ଏକ ଜ୍ଵଳନ୍ତ ଉଦାହରଣ ଦେଖିବାକୁ ମିଳିଛି। ଶ୍ରୀରାମ ସେନାର କିଛି କର୍ମୀ ଜଣେ ମୁସଲମାନ ଯୁବକଙ୍କୁ ଗଛରେ ବାନ୍ଧି ମାଡ଼ ମାରୁଥିବାର ଭିଡିଓ ଏକ ଜାତୀୟ ଗଣମାଧ୍ୟମରେ ପ୍ରସାରିତ ହେବା ପରେ ଏହା ସାମ୍ନାକୁ ଆସିଛି।
ଭିଡିଓରୁ ମିଳିଥିବା ସୂଚନା ଅନୁସାରେ, ମୁସଲମାନ ଯୁବକ ଜଣକ ଗୋମାଂସ ନେଇ ଯାଉଥିବା ସନ୍ଦେହରେ ଶ୍ରୀରାମ ସୋନାର କର୍ମୀମାନେ ତାଙ୍କୁ ଆକ୍ରମଣ କରିଛନ୍ତି। ଏପରି କି ସମ୍ପୃକ୍ତ ମୁସଲମାନ ଯୁବକଙ୍କୁ ସେମାନଙ୍କ ପାଦ ଧରି ଜୟ ଶ୍ରୀରାମ କହିବାକୁ ବାଧ୍ୟ କରାଯାଇଥିବା ଦେଖାଯାଇଛି। ଉକ୍ତ ଯୁବକଙ୍କ ପରିଚୟ ମିଳି ନ ଥିବା ବେଳେ ଘଟଣାଟି କେଉଁଠି ଘଟିଛି ତାହା ଜଣାପଡ଼ିନାହିଁ।
ପୁଲିସ ସୂଚନା ମୁତାବକ, ଗୋରୁ ମାଂସ ରଖିଥିବା ଅଭିଯୋଗରେ ୩ ଯୁବକଙ୍କୁ ଗିରଫ କରାଯାଇଥିଲା। କିନ୍ତୁ ସମ୍ପୃକ୍ତ ଯୁବକମାନେ ଶ୍ରୀରାମ ସେନାର କର୍ମୀମାନଙ୍କ ଦ୍ବାରା ଆକ୍ରମଣର ଶିକାର ହୋଇଥିବା ନେଇ ଏକ ଭିଡିଓ ପରବର୍ତ୍ତୀ ସମୟରେ ଭାଇରାଲ ହୋଇଥିଲା। ଏ ନେଇ ଥାନାରେ ଏତଲା ହେବା ପରେ ଆକ୍ରମଣକାରୀଙ୍କୁ ପୁଲିସ ଗିରଫ କରିଛି।
ଅନ୍ୟପଟେ ଭିଡିଓକୁ ନେଇ ରାଜନୀତି ଆରମ୍ଭ ହୋଇଯାଇଛି। ଏଆଇଏମଆଇଏମ ମୁଖ୍ୟ ଅସଉଦ୍ଦିନ ଓୱେସୀ କେନ୍ଦ୍ର ସରକାରଙ୍କୁ ଟାର୍ଗେଟ କରି ମୋଦୀ ସରକାରଙ୍କ ସମୟରେ ମୁସଲମାନଙ୍କୁ ଏଭଳି ବ୍ୟବହାର କରାଯାଉଛି ବୋଲି କହିଛନ୍ତି। ଅନ୍ୟପଟେ ମୁସଲମାନ ଯୁବକଙ୍କୁ ଆକ୍ରମଣ କରୁଥିବା ୩ ଜଣଙ୍କ ମଧ୍ୟରୁ ଜଣେ ସାଧ୍ଵୀ ପ୍ରଜ୍ଞା ଠାକୁରଙ୍କ ସମର୍ଥକ ବୋଲି ଜଣାପଡ଼ିଛି। ସାଧ୍ଵୀ ବିଜେପି ଟିକେଟରେ ଭୋପାଳ ଲୋକସଭାରୁ ବିଜୟ ହେବା ପରେ ସମ୍ପୃକ୍ତ ଯୁବକ ତାଙ୍କ ପାଖରେ ଛିଡ଼ା ହୋଇଥିବା ଏକ ଫଟୋରେ ଦେଖିବାକୁ ମିଳିଛି।
