ଜାକର୍ତ୍ତା : ଇଣ୍ଡୋନେସିଆରେ ଭୂମିକମ୍ପ ଓ ସୁନାମୀ ପରେ ପୁଣି ଏକ ପ୍ରାକୃତିକ ବିପର୍ଯ୍ୟୟ ଦେଖାଯାଇଛି। ଭୂମିକମ୍ପ ପ୍ରଭାବରେ ସୁନାମୀ ହୋଇଥିବାବେଳେ ଏବେ ଆଗ୍ନେୟ ଉଦ୍ଗୀରଣ ହୋଇଛି। ସୁଲାୱେସୀ ଦ୍ୱୀପର ସୋପୁଟାନ ପାହାଡରେ ଆଗ୍ନେୟ ଉଦ୍ଗୀରଣ ହୋଇଛି। ଆଗ୍ନେୟ ଉଦ୍ଗୀରଣ ଯୋଗୁଁ ଆକାଶର ୬୦୦୦ ମିଟର ଉଚ୍ଚ ପର୍ଯ୍ୟନ୍ତ ଧୂଆଁ ଓ ପାଉଁଶ ଆଚ୍ଛାଦିତ ହୋଇପଡିଛି। ତେବେ ଏହି ଆଗ୍ନେୟ ଉଦ୍ଗୀରଣକୁ ନେଇ ଲୋକଙ୍କୁ ସ୍ଥାନାନ୍ତର କରିବା ଲାଗି କୌଣସି ପ୍ରକାର ନିର୍ଦେଶ ଦିଆଯାଇ ନାହିଁ। ଭୂତତ୍ତ୍ୱବିଦ୍ଙ୍କ କହିବା ଅନୁଯାୟୀ ସେପ୍ଟେମ୍ବର ୨୮ରେ ହୋଇଥିବା ଭୂମିକମ୍ପ ପ୍ରଭାବରେ ଏହି ଆଗ୍ନେୟ ଉଦ୍ଗୀରଣ ହୋଇଛି। ଇଣ୍ଡୋନେସିଆରେ ଏବେ ୧୨୦ଟି ଜୀବନ୍ତ ଆଗ୍ନେୟଗିରି ରହିଛି। ସେପ୍ଟେମ୍ବର ୨୮ରେ ହୋଇଥିବା ଭୂମିକମ୍ପ ଓ ଏହାର ପରବର୍ତ୍ତୀ ସୁନାମୀରେ ୧୩୦୦ରୁ ଅଧିକ ଲୋକଙ୍କର ମୃତ୍ୟୁ ହେଲାଣି। ଉଦ୍ଧାର କାର୍ଯ୍ୟ ଜାରି ରହିଥିବାବେଳେ ମୃତ୍ୟୁସଂଖ୍ୟା ବୃଦ୍ଧି ପାଇବାରେ ଲାଗିଛି।
