ସମାଜ ଡିଜିଟାଲ ଡେସ୍କ: ଉତ୍ତରପ୍ରଦେଶର ହାପୁରରେ ମର୍ମନ୍ତୁଦ ସଡ଼କ ଦୁର୍ଘଟଣା ଘଟିଛି । ଏକ ଦ୍ରୁତଗାମୀ ଟ୍ରକ୍ ଧକ୍କା ଦେବାରୁ ବାଇକରେ ଯାଉଥିବା ଗୋଟିଏ ପରିବାରର ୫ଜଣଙ୍କ ମୃତ୍ୟୁ ହୋଇଛି । ଘଟଣାସ୍ଥଳରେ ବାଇକ ଆରୋହୀଙ୍କ ସମେତ ୪ଜଣ ନିଷ୍ପାପ ପିଲାଙ୍କ ଜୀବନ ଯାଇଛି ।
ସୂଚନା ଅନୁସାରେ ମୃତକ ରଫିକନଗରର ବାସିନ୍ଦା ଦାନିଶ, ତାଙ୍କ ଦୁଇ ପିଲା ସମାଇରା, ମାୟରା ଏବଂ ଭାଇ ସରତାଜଙ୍କ ପିଲା ସମର, ମିହିମଙ୍କ ସହିତ ହାଫିଜପୁର ଅଞ୍ଚଳରେ ଥିବା ଏକ ଫାର୍ମ ହାଉସର ସୁଇମିଂ ପୁଲକୁ ଗାଧୋଇବାକୁ ଯାଇଥିଲେ । ସେଠାରୁ ବୁଲିବା ପରେ ସମସ୍ତେ ଗୋଟିଏ ବାଇକରେ ମାଜିଦପୁରା ସ୍ଥିତ ନିଜ ଘରକୁ ଫେରୁଥିଲେ । ହାଫିଜପୁର ପୁଲିସ ଷ୍ଟେସନ ନିକଟରେ ସେମାନେ ପହଞ୍ଚିବା ବେଳେ ହଠାତ ଦ୍ରୁତ ଗତିରେ ଆସୁଥିବା ଏକ କ୍ୟାଣ୍ଟର ସେମାନଙ୍କୁ ଧକ୍କା ଦେଇଥିଲା । ଦୁର୍ଘଟଣା ଏତେ ଭୟଙ୍କର ଥିଲା ଯେ ଘଟଣା ସ୍ଥଳରେ ହିଁ ୫ଜଣଙ୍କ ଜୀବନ ଚାଲି ଯାଇଥିଲା । ପୁଳଇସ ଘଟଣାସ୍ଥଳରେ ପହଞ୍ଚି ତଦନ୍ତ କରୁଛି । ଗୋଟିଏ ପରିବାରର ୫ଜଣଙ୍କ ମୃତ୍ୟୁ ହୋଇଥିବାରୁ ପରିବାରରେ ଶୋକର ଛାୟା ଖେଳିଯାଇଛି ।
