ସାଉଦି ଆରବ: ସାଉଦି ଆରବରେ ଆମେରିକା-ୟୁକ୍ରେନ୍ ଶାନ୍ତି କଥାବାର୍ତ୍ତା ସଫଳ ହୋଇଛି ଏବଂ ଋଷିଆ ବିରୋଧରେ ଅସ୍ତ୍ରବିରତି ପାଇଁ ୟୁକ୍ରେନ୍ ସହମତି ପ୍ରକାଶ କରିଛି। ଆମେରିକାର ୩୦ ଦିନିଆ ଅସ୍ତ୍ରବିରତିକୁ ୟୁକ୍ରେନ୍ ମାନି ଦେଇଛି। ୟୁକ୍ରେନ୍ ପଦକ୍ଷେପକୁ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ସ୍ୱାଗତ କରିଥିବାବେଳେ ଏବେ ଅସ୍ତ୍ରବିରତି ପାଇଁ ପୁଟିନ ମାନିବେ ବୋଲି ସେ ପ୍ରକାଶ କରିଛନ୍ତି। ୩ବର୍ଷ ହେଲାଣି ଋଷିଆ ୟୁକ୍ରେନ୍ ଯୁଦ୍ଧ ଲାଗି ରହିଛି।
ସାଉଦି ଆରବରେ ଆମେରିକା ଏବଂ ୟୁକ୍ରେନୀୟ ଅଧିକାରୀଙ୍କ ମଧ୍ୟରେ ଗୁରୁତ୍ୱପୂର୍ଣ୍ଣ ଶାନ୍ତି ଆଲୋଚନା ପରେ ୟୁକ୍ରେନ ରାଷ୍ଟ୍ରପତି ଭୋଲଡିମର ଜେଲେନ୍ସକି କହିଛନ୍ତି ଯେ ଆମେରିକା ଦ୍ୱାରା ପ୍ରସ୍ତାବିତ ୩୦ ଦିନିଆ ଅସ୍ତ୍ରବିରତିକୁ ୟୁକ୍ରେନୀ ଗ୍ରହଣ କରିଛି।
ଆଠ ଘଣ୍ଟାରୁ ଅଧିକ ସମୟ ଧରି ଅନୁଷ୍ଠିତ ବୈଠକ ପରେ ଜେଲେନ୍ସକି କହିଛନ୍ତି ଯେ ୟୁକ୍ରେନ ଦ୍ୱାରା ଗ୍ରହଣ କରାଯାଇଥିବା ଅସ୍ତ୍ରବିରତି ପ୍ରସ୍ତାବ କେବଳ ଆକାଶ ଏବଂ ସମୁଦ୍ର ନୁହେଁ, ଋଷ ସହିତ ଯୁଦ୍ଧର ସମ୍ପୂର୍ଣ୍ଣ ସମ୍ମୁଖଭାଗକୁ ଅନ୍ତର୍ଭୁକ୍ତ କରେ। “ୟୁକ୍ରେନ ଏହି ପ୍ରସ୍ତାବକୁ ଗ୍ରହଣ କରୁଛି, ଆମେ ଏହାକୁ ସକାରାତ୍ମକ ବୋଲି ବିଚାର କରୁଛୁ ଏବଂ ଆମେରିକାକୁ ଋଷକୁ ଏଥିପାଇଁ ରାଜି କରାଇବାକୁ ପଡିବ,” ଜେଲେନ୍ସକି କହିଛନ୍ତି, ମସ୍କୋ ଏଥିରେ ରାଜି ହେବା କ୍ଷଣି ଅସ୍ତ୍ରବିରତି ଆରମ୍ଭ ହେବ।
ଜେଦ୍ଦାରେ ଅନୁଷ୍ଠିତ ବୈଠକ ପରେ ଆମେରିକା ୟୁକ୍ରେନ ସହିତ ଏକ ମିଳିତ ବିବୃତ୍ତିରେ କହିଛି ଯେ ଏହା ଗୁଇନ୍ଦା ସୂଚନା ବଣ୍ଟନ ଉପରେ ତୁରନ୍ତ ବିରତି ଉଠାଇବ ଏବଂ ୟୁକ୍ରେନ ସୁରକ୍ଷା ସହାୟତା ପୁନଃ ଆରମ୍ଭ କରିବ।
ବୈଠକ ପରେ ଆମେରିକାର ବୈଦେଶିକ ମନ୍ତ୍ରୀ ମାର୍କୋ ରୁବିଓ କହିଛନ୍ତି ଯେ ଯୁଦ୍ଧ ସମାପ୍ତ କରିବା ପାଇଁ ପଦକ୍ଷେପ ନେବାର ଦାୟିତ୍ୱ ଏବେ ଋଷ ଉପରେ। “ଆମେ ଆଶା କରୁଛୁ ଯେ ସେମାନେ ହଁ କହିବେ, ସେମାନେ ଶାନ୍ତି ପାଇଁ ହଁ କହିବେ। ବଲ୍ ଏବେ ସେମାନଙ୍କ କୋର୍ଟରେ ବୋଲି ପ୍ରକାଶ କରିଛନ୍ତି।
ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ୟୁକ୍ରେନ୍ ପଦକ୍ଷେପକୁ ସ୍ୱାଗତ କରିଛନ୍ତି ଏବଂ ଯୋଜନା ବିଷୟରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନଙ୍କ ସହ କଥା ହେବେ ବୋଲି କହିଚନ୍ତି। ସମ୍ଭବତଃ ଏହି ସପ୍ତାହରେ ପୁଟିନ ଅସ୍ତ୍ରବିରତି ପାଇଁ ରାଜି ହେବେ ବୋଲି ଟ୍ରମ୍ପ ଆଶା ପ୍ରକାଶ କରିଛନ୍ତି।
