ତାଲିବାନ ସହିତ ନିରବଚ୍ଛିନ୍ନ ଆଲୋଚନା ଜାରି ରଖିଛି ଆମେରିକା

ୱାଶିଂଟନ: ତାଲିବାନ ଆତଙ୍କି ଗୋଷ୍ଠୀ ସହିତ ଆମେରିକା ସରକାର ପ୍ରତିଦିନ ନିରବଚ୍ଛିନ୍ନ ଭାବରେ ଆଲୋଚନା ଜାରି ରଖିଛନ୍ତି। ତାଲିବାନକୁ ନେଇ ଆମେରିକାର କୌଣସି ଭ୍ରମ ନାହିଁ। ଅଗଷ୍ଟ ୩୧ ପୂର୍ବରୁ ଆଫଗାନିସ୍ତାନରୁ ହଜାର ହଜାର ସଂଖ୍ୟାରେ ଲୋକଙ୍କୁ ସ୍ଥାନାନ୍ତରିତ କରିବା ପ୍ରାଥମିକତା ହୋଇଛି ବୋଲି ଆମେରିକାର ରାଷ୍ଟ୍ରୀୟ ସୁରକ୍ଷା ପରାମର୍ଶଦାତା (ଏନଏସଏ) ଜେମସ ସୁଲିଭାନ କହିଛନ୍ତି। ସୁଲିଭାନ କହିଛନ୍ତି, ଏହି ଆଲୋଚନାର ବିଷୟବସ୍ତୁ ସମ୍ପର୍କରେ ସେ ବିସ୍ତୃତ ଭାବେ ପ୍ରକାଶ କରିପାରିବେ ନାହିଁ। କେବଳ ଏତିକି କହିବେ ଯେ ବିବିଧ ପ୍ରସଙ୍ଗ ଉପରେ ଆଲୋଚନା ଜାରି ରହିଛି। ସେ କହିଛନ୍ତି, ଅଗଷ୍ଟ ୩୧ ସୁଦ୍ଧା ଆଫଗାନିସ୍ତାନ ଛାଡିବାକୁ ଆମେରିକୀୟ ସୈନ୍ୟଙ୍କ ପାଇଁ ଯେଉଁ ସମୟ ସ୍ଥିର କରାଯାଇଛି, ତାହାକୁ ଏବେ ମଧ୍ୟ ଆମେରିକା ମନ ଭିତରେ ରଖି କାର୍ଯ୍ୟ କରୁଛି। ସଂପ୍ରତି ଆମେରିକା କେବଳ ଆଫଗାନିସ୍ତାନରୁ ହଜାର ହଜାର ସଂଖ୍ୟାରେ ଲୋକଙ୍କୁ ଅନ୍ୟତ୍ର ସ୍ଥାନାନ୍ତରଣ ଉପରେ ଦୃଷ୍ଟିନିବଦ୍ଧ କରୁଛି।
ଇତିମଧ୍ୟରେ ସୋମବାର ଦିନ ଆମେରିକା ରାଷ୍ଟ୍ରପତି ଜୋ ବାଇଡେନ ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନଙ୍କ ସହିତ ଆଫଗାନ ପ୍ରସଙ୍ଗରେ ଆଲୋଚନା କରିଛନ୍ତି। ଉକ୍ତ ଯୁଦ୍ଧବିଧ୍ୱସ୍ତ ରାଷ୍ଟ୍ରରୁ ନାଗରିକମାନଙ୍କୁ କିଭଳି ନିରାପଦରେ ସ୍ଥାନାନ୍ତର କରାଯିବ ତାହା ଉପରେ ଆଲୋଚନା ହୋଇଥିଲା। ଏହାପରେ ମଙ୍ଗଳବାର ଦିନ ବାଇଡେନ ଭର୍ଚୁଆଲ ପଦ୍ଧତିରେ ଜି-୭ ବୈଠକରେ ଉଦବୋଧନ ଦେଇଥିଲେ। ଅଗଷ୍ଟ ୧୪ ତାରିଖ ଠାରୁ ଆମେରିକା ଇତିମଧ୍ୟରେ ଆଫଗାନିସ୍ତାନରୁ ପ୍ରାୟ ୪୮,୦୦୦ ଲୋକଙ୍କୁ ସ୍ଥାନାନ୍ତର କରିଛି ଅଥବା ସେଥିରେ ସହଯୋଗ କରିଛି। କାବୁଲରୁ ଏହା ପ୍ରାୟ ୧୦,୯୦୦ ଲୋକଙ୍କୁ ସ୍ଥାନାନ୍ତର କରିସାରିଥିବା ଜଣାଯାଇଛି।