ଉତ୍ତରପ୍ରଦେଶରେ ସଡ଼କ ଦୁର୍ଘଟଣାରେ ୧୨ ମୃତ

ଉତ୍ତରପ୍ରଦେଶ: ଉତ୍ତରପ୍ରଦେଶରେ ମଙ୍ଗଳବାର ସକାଳେ ଦୁଇଟି ସଡ଼କ ଦୁର୍ଘଟଣାରେ ୧୨ଜଣ ଲୋକ ପ୍ରାଣ ହରାଇଛନ୍ତି। ପ୍ରଥମ ଦୁର୍ଘଟଣାଟି ଯମୁନା ଏକ୍ସପ୍ରେସୱେରେ ମଥୁରାଠାରେ ଘଟିଛି। ଗୋଟିଏ ଆମ୍ବୁଲାନ୍ସ ଓ ଏକ କାର୍‍ ମଧ୍ୟରେ ମୁହାଁମୁହିଁ ଧକ୍କା ହେବା ଫଳରେ ୭ଜଣ ଲୋକଙ୍କର ଘଟଣାସ୍ଥଳରେ ମୃତ୍ୟୁ ଘଟିଥିବାବେଳେ ୪ଜଣ ଆହତ ହୋଇଛନ୍ତି। ଆହତମାନଙ୍କ ଅବସ୍ଥା ଗୁରୁତର ରହିଛି। ଦ୍ୱିତୀୟ ଦୁର୍ଘଟଣାରେ ପଶ୍ଚିମବଙ୍ଗରେ ଚାକିରୀ କରିଥିବା ଜଣେ ଆଇପିଏସ୍‍ ଅଫିସରଙ୍କ ପରିବାରର ସଦସ୍ୟଙ୍କ ସମେତ ୫ଜଣ ଲୋକ ପ୍ରାଣ ହରାଇଛନ୍ତି। କାନପୁର-ସାଗର ରାଜପଥରେ ଗୋଟିଏ ଟ୍ରକ ସେମାନଙ୍କ କାର୍‍କୁ ଧକ୍କା ଦେବାରୁ ଦୁର୍ଘଟଣା ଘଟିଥିଲା। ସେମାନେ ମଧ୍ୟପ୍ରଦେଶର ଛତ୍ରପୁର ଜିଲ୍ଲାକୁ ଯାଉଥିଲେ।