ସୁରତ: ଦେଶ ବିଭାଜନର ପ୍ରାୟଶ୍ଚିତ ହେଉଛି ନାଗରିକତା ସଂଶୋଧ ଆଇନ(ସିଏଏ)। କଂଗ୍ରେସ ଦେଶକୁ ବିଭାଜନ କରି ଯେଉଁ ପାପ କରିଛି, ସିଏଏ ମାଧ୍ୟମରେ ଆମେ ତା’ର ପ୍ରାୟଶ୍ଚିତ କରୁଛୁ। ଏହାକୁ ବିରୋଧ କରିବା ପରିବର୍ତ୍ତେ ଏହାକୁ ସମର୍ଥନ କରିବା ସହ ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅଭିନନ୍ଦନ ଜଣାଇବା ଉଚିତ। କେନ୍ଦ୍ରମନ୍ତ୍ରୀ ତଥା ବିଜେପି ସାଂସଦ ପ୍ରତାପ ଷଡ଼ଙ୍ଗୀ ଶନିବାର ନାଗରିକତା ସଂଶୋଧନ ଆଇନ ନେଇ ଗୁଜରାଟର ସୁରତରେ କଂଗ୍ରେସକୁ ଟାର୍ଗେଟ କରି ଏପରି କହିଛନ୍ତି। ଧାର୍ମିକ ନିର୍ଯାତନା ସହି ଯେଉଁ ସଂଖ୍ୟାଲଘୁମାନେ ସୀମା ଅତିକ୍ରମ କରି ଭାରତ ଆସିଛନ୍ତି, ସେମାନଙ୍କୁ ନାଗରିକତା ପ୍ରଦାନ କରିବା ପାଇଁ କେନ୍ଦ୍ର ସରକାର ଏହି ଆଇନ ଆଣିଛନ୍ତି। ତେଣୁ ଏହାକୁ ବିରୋଧ କରିବାର କୌଣସି କାରଣ ନାହିଁ ବରଂ ଏହି ପଦକ୍ଷେପ ପ୍ରଶଂସା ଯୋଗ୍ୟ ବୋଲି ସେ କହିଛନ୍ତି।
#WATCH Union Minister Pratap Sarangi in Surat, Gujarat: Those who do not accept Vande Mataram have no right to live in India. (18.01.2020) pic.twitter.com/zEr4R8Z7Op
— ANI (@ANI) January 18, 2020
ସେ ପୁନଶ୍ଚ କହିଛନ୍ତି, ସିଏଏକୁ ନେଇ କଂଗ୍ରେସ ଲୋକଙ୍କୁ ଭ୍ରମିତ କରି ଦେଶରେ ନିଆଁ ଲଗାଇବାକୁ ଚେଷ୍ଟା କରୁଛି। ଯେଉଁମାନଙ୍କୁ ଭାରତର ସ୍ବାଧୀନତା, ଅଖଣ୍ଡତା ଓ ବନ୍ଦେ ମାତରମ ସ୍ୱୀକାର ନୁହେଁ, ସେମାନଙ୍କର ଦେଶରେ ରହିବାର କୌଣସି ଅଧିକାର ନାହିଁ ବୋଲି ବିରୋଧୀଙ୍କୁ ଟାର୍ଗେଟ୍ ସ୍ବରୂପ ମନ୍ତ୍ରୀ ଷଡ଼ଙ୍ଗୀ କହିଛନ୍ତି।
