ନୂଆଦିଲ୍ଲୀ : କୃଷକମାନେ ଏଣିକି ସେମାନଙ୍କର ଉତ୍ପାଦକୁ ମାଣ୍ଡି ବ୍ୟତୀତ ରପ୍ତାନିକାରୀଙ୍କୁ ସିଧାସଳଖ ବିକ୍ରୟ କରିପାରିବେ। ସେହିପରି ଅତ୍ୟାବଶ୍ୟକ ସାମଗ୍ରୀ ଅଧିନିୟମରୁ ଅନେକ କୃଷିଜାତ ସାମଗ୍ରୀକୁ ବାଦ ଦିଆଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି ।
ଏକ ସପ୍ତାହ ମଧ୍ୟରେ ପ୍ରଧାନମନ୍ତ୍ରୀଙ୍କ ବାସଭବନରେ ବୁଧବାର ଅନୁଷ୍ଠିତ ଦ୍ୱିତୀୟ କ୍ୟାବିନେଟ ବୈଠକରେ କୃଷକଙ୍କ ସହ ଜଡିତ ଅନେକ ନିଷ୍ପତ୍ତି ନିଆଯାଇଛି ।
ବୈଠକରେ କୁହାଯାଇଛି ଯେ ଭାରତ ଗୋଟିଏ ଦେଶ ଗୋଟିଏ ବଜାର ଆଡକୁ ଗତି କରୁଛି । ସମ୍ପ୍ରତି ଘୋଷଣା କରାଯାଇଥିବା ଆତ୍ମନିର୍ଭର ଭାରତ ପ୍ୟାକେଜ୍ ଅନୁଯାୟୀ କୃଷି ସମ୍ବନ୍ଧୀୟ ଘୋଷଣାକୁ ଅନୁମୋଦନ କରାଯାଇଥିଲା ଏବଂ ବହୁ କୃଷିଜାତ ଦ୍ରବ୍ୟକୁ ଅତ୍ୟାବଶ୍ୟକ ସାମଗ୍ରୀ ଅଧିନିୟମରୁ ବାଦ ଦିଆଯାଇଛି।
ଏହା ସହିତ କୃଷକମାନଙ୍କୁ ଅତ୍ୟାବଶ୍ୟକ ସାମଗ୍ରୀ ଆଇନ ବାହାରେ କୃଷି ଉତ୍ପାଦ ବିକ୍ରୟ କରିବାକୁ କୃଷକଙ୍କୁ ଅନୁମତି ଦିଆଯାଇଛି । ବର୍ତ୍ତମାନ କୃଷକମାନେ ସେମାନଙ୍କର ଉତ୍ପାଦକୁ ମାଣ୍ଡି ବ୍ୟତୀତ ରପ୍ତାନିକାରୀଙ୍କୁ ସିଧାସଳଖ ବିକ୍ରୟ କରିପାରିବେ, ଯାହା ଦ୍ବାରା ସେମାନେ ଅଧିକ ଲାଭ ପାଇବେ।
ବୈଠକ ପରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ କେନ୍ଦ୍ର ସୂଚନା ଏବଂ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି ଯେ କରୋନା ଭୂତାଣୁ ସଙ୍କଟ ସମୟରେ ସରକାର ଚାଷୀଙ୍କ ସ୍ୱାର୍ଥ ରକ୍ଷା ପାଇଁ ନିଷ୍ପତ୍ତି ନେଇଥିଲେ। ଜାଭଡେକର କହିଛନ୍ତି ଏହି ବୈଠକରେ ଅତ୍ୟାବଶ୍ୟକ ସାମଗ୍ରୀ ଆଇନରେ ଐତିହାସିକ ସଂଶୋଧନ ପାଇଁ ଅନୁମତି ଦିଆଯାଇଛି। ସେ କହିଛନ୍ତି ଯେ ଏହି ନିଷ୍ପତ୍ତି କୃଷକ ତଥା କୃଷି କ୍ଷେତ୍ରର ଉନ୍ନତିରେ ଏକ ମାଇଲଖୁଣ୍ଟ ହେବ।
ଛଅ ଦଶନ୍ଧିରୁ ଅଧିକ ପୁରୁଣା ଅତ୍ୟାବଶ୍ୟକ ସାମଗ୍ରୀ ଅଧିନିୟମକୁ ସଂଶୋଧନ କରି କେନ୍ଦ୍ର କ୍ୟାବିନେଟ ବୁଧବାର ଏଥିରୁ ଶସ୍ୟ, ଡାଲି, ଆଳୁ ଏବଂ ପିଆଜ ଇତ୍ୟାଦିକୁ ବାଦ ଦେଇଛି। କୃଷି କ୍ଷେତ୍ରର ଉନ୍ନତି ତଥା ଚାଷୀଙ୍କ ଆୟ ବୃଦ୍ଧି ପାଇଁ ସରକାର ଏହି ନିଷ୍ପତ୍ତି ନେଇଛନ୍ତି। କ୍ୟାବିନେଟ ମଧ୍ୟ କୃଷି ଉତ୍ପାଦନ ବାଣିଜ୍ୟ ଏବଂ ବାଣିଜ୍ୟ ଅଧ୍ୟାଦେଶ- ୨୦୨୦କୁ ଅନୁମୋଦନ କରିଛି। ଏହି ନିୟମ କୃଷିଜାତ ଦ୍ରବ୍ୟରେ ପ୍ରତିବନ୍ଧକମୁକ୍ତ ବାଣିଜ୍ୟ ନିଶ୍ଚିତ କରିବ।
