ଶ୍ରୀନଗର: ଜାମ୍ମୁ କାଶ୍ମୀର ଉପତ୍ୟକା ଅଞ୍ଚଳରେ ଲୋକମାନଙ୍କୁ ମନୋରଞ୍ଜନର ଖୋରାକ ଯୋଗାଇଦେବା ଉଦ୍ଦେଶ୍ୟରେ ମଲ୍ଟିପ୍ଲେକ୍ସ ଖୋଲିବା ଉପରେ ରାଜ୍ୟପାଳ ସତ୍ୟ ପାଲ ମଲିକ ଗୁରୁତ୍ୱ ଦେଇଛନ୍ତି। ସେ କହିଛନ୍ତି ଯେ ସନ୍ଧ୍ୟା ୬ଟା ପରେ କାଶ୍ମୀର ଲୋକଙ୍କ ପାଇଁ ବିଶେଷ କିଛି କରିବାର ନାହିଁ ଏବଂ ସେଠାରେ ସିନେମା ହଲଗୁଡିକ କାହିଁ କେଉଁ କାଳରୁ ବନ୍ଦ ରହିଛି ଓ କଫି ହାଉସ ଖୋଲିବା ପାଇଁ ଅନୁମତି ମିଳିବାକୁ ୪ବର୍ଷ ଲାଗିଥାଏ। ସେଠାରେ ଦୂରଦର୍ଶନର ଡ଼ିସ ଟିଭି ଦେୟମୁକ୍ତ ସେବାର ଶୁଭାରମ୍ଭ କରିବା ଅବସରରେ ସେ କହିଛନ୍ତି, ସନ୍ଧ୍ୟା ପରେ ସମୟ କାଟିବା ବହୁତ କଷ୍ଟଦାୟକ।
ରାଜ୍ୟପାଳ ସତ୍ୟ ପାଲ କହିଛନ୍ତି ଯେ, କାଶ୍ମୀର ଲୋକମାନେ ଏତେ ମାତ୍ରାରେ ସକ୍ରିୟ ଯେ ସେମାନେ ଛୁଟିଦିନଗୁଡିକରେ କ୍ଷେତ ଏବଂ ପାର୍କକୁ ଯାଇ ସେଠାରେ ମଧ୍ୟାହ୍ନ ଭୋଜନ କରିଥାନ୍ତି। କିନ୍ତୁ ଆମେ ସେମାନଙ୍କ ମନୋରଞ୍ଜନ ପାଇଁ କିଛି ବି କରି ପାରି ନାହୁଁ। ତେବେ ଖୁବ ଶୀଘ୍ର ମଲ୍ଟିପ୍ଲେକ୍ସ ସ୍ଥାପନ କରାଯିବ ବୋଲି ରାଜ୍ୟପାଳ ସତ୍ୟ ପାଲ ମଲିକ କହିଛନ୍ତି।
ଆତଙ୍କବାଦୀ ଆକ୍ରମଣ ଯୋଗୁ ୧୯୮୯ ପରଠାରୁ କାଶ୍ମୀରର ସମସ୍ତ ଫିଲ୍ମ ହଲ ବନ୍ଦ ରହିଥିବା ବେଳେ, ପରବର୍ତ୍ତୀ ସମୟରେ ସେହି ହଲଗୁଡିକୁ ଖୋଲିବାକୁ ଉଦ୍ୟମ କରାଯାଇଥିଲେ ମଧ୍ୟ ପୁଣି ଗ୍ରେନେଡ଼ ମାଡ଼ ଯୋଗୁ ବନ୍ଦ ରଖାଯାଇଥିଲା।
