ପାଟଣା : କେନ୍ଦୁଝର ଜିଲ୍ଲାର ଲାଇଫ୍ ଲାଇନ ୨୦ ନଂ ଜାତୀୟ ରାଜପଥ ଅନ୍ତର୍ଗତ ଖଂଟଘର ଟୋଲ ପ୍ଲାଜାରେ କର୍ମଚାରୀ ମାନଙ୍କୁ ୮ ଘଂଟା ବଦଳରେ ଦୈନିକ ୧୨ ଘଂଟା କାମ କରାଯାଉଥିବା ସହ ନିୟମିତ ବେତନ ଦିଆଯାଉ ନ ଥିବା ଓ ଟୋଲ ପ୍ଲାଜା କର୍ମଚାରୀ ସଂଘ ପକ୍ଷରୁ କର୍ତୃପକ୍ଷଙ୍କୁ ଦିଅଯାଇ ୧୧ ଦଫା ଦାବି ପୂରଣ କରାଯାଉ ନ ଥିବାରୁ ଆଜି ସନ୍ଧ୍ୟାରେ ଟୋଲ ପ୍ଲାଜାକୁ ୨ ଘଂଟା ଧରି କର୍ମଚାରୀ ମାନେ ବନ୍ଦ କରିଦେଇଥିଲେ । ଯାହାଫଳରେ ବହୁ ଯାନବାହାନ ଟୋଲ ପ୍ଲାଜାର ଉଭୟ ପାଶ୍ୱର୍ରେ ଅଟକି ରହିଥିଲେ । ଖବର ପାଇ ପୁଲିସ ଆନ୍ଦୋଳନକାରୀ ମାନଙ୍କୁ ହଟାଇବା ପରେ ଯାନବାହାନ ଚଳାଚଳ ସ୍ୱାଭାବିକ ହୋଇଛି । ଖଂଟଘର ଟୋଲ ପ୍ଲାଜା କର୍ମଚାରୀ ସଂଘ ପକ୍ଷରୁ ଟୋଲ ପ୍ଲାଜା କର୍ତୃପକ୍ଷ ମେସର୍ସ ସୁରେଶ ଚନ୍ଦ୍ର ଅଗ୍ରୱାଲା ଙ୍କ ସାଧାରଣ ପରିଚାଳକଙ୍କୁ ୧୧ ଦଫା ସମ୍ବଳିତ ଦାବିପତ୍ର ଦିଆଯାଇଥିଲା । ଦାବି ମଧ୍ୟରେ ୩୦ ପ୍ରତିଶତ ଦରମା ବୃଦ୍ଧି, ଇପିଏଫ ଏବଂ ଇଏସଆଇସି ସୁବିଧା, କର୍ମଚାରୀଙ୍କ ପାଇଁ ଦୂର୍ଘଟଣା ବୀମା, ସିକ୍ୟୁରିଟି ଏଜେନ୍ସିର ପ୍ରତ୍ୟାହାର, ଘରଭଡା, ହାଉସିଂ ଏଲାଉନ୍ସ ଆଦି ଦରମାରେ ମିଶ୍ରଣ, କର୍ମଚାରୀଙ୍କୁ ନିଯୁକ୍ତି ଚିଠି ଓ ପରିଚୟ ପତ୍ର ପ୍ରଦାନ, ଛୁଟି ସମୟର ଦରମା ପ୍ରଦାନ, ପ୍ରତିମାସ ୭ ତାରିଖ ସୁଦ୍ଧା ଦରମା ସହ ଦରମା ସ୍ଲିପ ପ୍ରଦାନ, ପ୍ରତି ସପ୍ତାହରେ କର୍ମଚାରୀଙ୍କୁ ଦିନକ ପାଇଁ ଛୁଟି, ବକେୟା ଇପିଏଫ ଇଏସଆଇସି ଗୋଟିଏ ସପ୍ତାହ ମଧ୍ୟରେ ପ୍ରଦାନ , ଜାତୀୟ ଛୁଟି ଦିବସରେ କାମ ପାଇଁ ସେହିଦିନ ପାଇଁ ଦୁଇଗୁଣ ଦରମା ପ୍ରଦାନ ଆଦି ଦାବି ଅର୍ନ୍ତଭୁକ୍ତ ଥିବାବେଳେ କର୍ତୃପକ୍ଷ ଦୀର୍ଘଦିନ ଧରି ଏହି ଦାବି ପୂରଣ କରୁ ନ ଥିବାରୁ ଆଜିର ଆନ୍ଦୋଳନ ହୋଇଥିବା ଜଣାପଡିଛି ।
Popular Categories
Previous article
Next article