ବନ୍ୟାରେ ଛାରଖାର କେରଳର ପୁନଃନିର୍ମାଣ ପାଇଁ ୩ ମନ୍ଦିରର ସୁନା ବ୍ୟବହାର କରାଯାଉ : ବିଜେପି ସାଂସଦ
ନୂଆଦିଲ୍ଲୀ : କେରଳର ୩ଟି ପ୍ରଖ୍ୟାତ ମନ୍ଦିରର ସମ୍ପତ୍ତି ଓ ସୁନାର ବିନିଯୋଗ କରି ବନ୍ୟାରେ ଛାରଖାର ରାଜ୍ୟର ପୁନଃନିର୍ମାଣ କରାଯାଉ ବୋଲି ବିଜେପି ସାଂସଦ ଉଦିତ ରାଜ ପ୍ରସ୍ତାବ ଦେଇଛନ୍ତି। କେରଳ ପଦ୍ମନାଭ, ସାବରିମାଳା, ଗୁରୁଭାୟୁର ମନ୍ଦିରର ସୁନା ଏବଂ ସମ୍ପତ୍ତି ମୂଲ୍ୟ ୧ ଲକ୍ଷ କୋଟି ଟଙ୍କାରୁ ଅଧିକ ହେବ। ଏପରିସ୍ଥଳରେ କେରଳ ବନ୍ୟାରେ ରାଜ୍ୟର ୨୧ ହଜାର କୋଟି ଟଙ୍କାର କ୍ଷତି ଘଟିଛି। ଅର୍ଥାତ ୩ ମନ୍ଦିରର ସମ୍ପତ୍ତି ବନ୍ୟା କ୍ଷୟକ୍ଷତିଠାରୁ ବହୁ ଅଧିକ। ଲୋକେ ରୋଗରେ, ବନ୍ୟାରେ କାନ୍ଦି କାନ୍ଦି ମରୁଥିବାବେଳେ ଏହି ସମ୍ପତ୍ତି କେଉଁ କାର୍ଯ୍ୟରେ ଲାଗିବା ଦରକାର ବୋଲି ଦଳିତ ବିଜେପି ନେତା ଉଦିତ ରାଜ ଟ୍ୱିଟ୍ କରିଛନ୍ତି। ଉତ୍ତର-ପଶ୍ଚିମ ଦିଲ୍ଲୀ ସାଂସଦ ଏହି କଥାକୁ ଉପସ୍ଥାପନ କରିବା ପାଇଁ ଲୋକଙ୍କୁ ନିବେଦନ କରିଛନ୍ତି। ଗତ ମାସରେ କେରଳ ବନ୍ୟାରେ ୪୦୦ରୁ ଊର୍ଦ୍ଧ୍ବ ଲୋକଙ୍କ ମୃତ୍ୟୁ ଘଟିଥିଲା। ବନ୍ୟା ସହାୟତା ପାଇଁ କେନ୍ଦ୍ର ସରକାର ୬୦୦ କୋଟି ଟଙ୍କା ପ୍ରଦାନ କରିଛନ୍ତି। ଅନ୍ୟ ରାଜ୍ୟ ସରକାର ମଧ୍ୟ ସହାୟତା ପ୍ରଦାନ କରିଛନ୍ତି।