ଜଗତସିଂହପୁର : ଜଗତସିଂହପୁର ଜିଲା ଏରସମା ବ୍ଲକର କୁଞ୍ଜକୋଠୀ ଉଚ୍ଚପ୍ରାଥମିକ ବିଦ୍ୟାଳୟର କନିଷ୍ଠ ଶିକ୍ଷକଙ୍କ ଦରମା ବନ୍ଦ ପ୍ରତିବାଦରେ ବୁଧବାର ବ୍ଲକ ଶିକ୍ଷାଧିକାରୀ(ବିଇଓ)ଙ୍କ କାର୍ଯ୍ୟାଳୟ ସମ୍ମୁଖରେ ଏକ ପ୍ରତିବାଦ ସଭା କରାଯାଇଛି। ଏହାସହ ଏରସମା ବିଇଓ ଜୟନ୍ତ କୁମାର ରାୟଙ୍କ ଉପସ୍ଥିତିରେ କିରାଣୀ ଦୀପକ ଜେନାଙ୍କ ମନମୁଖୀ କାର୍ଯ୍ୟ ଓ ଅସହିଷ୍ଣୁ ବ୍ୟବହାର ପାଇଁ ଶିକ୍ଷକ ସଂଘ ପକ୍ଷରୁ ଏକ ଲିଖିତ ଅଭିଯୋଗ କରାଯାଇଛି।
ସୂଚନା ଅନୁଯାୟୀ, ଏରସମା ବ୍ଲକର କୁଞ୍ଜକୋଠୀ ଉଚ୍ଚପ୍ରାଥମିକ ବିଦ୍ୟାଳୟର କନିଷ୍ଠ ଶିକ୍ଷକ ଭାବେ ବୈଷ୍ଣବ ଚରଣ ବିଶ୍ୱାଳ କାର୍ଯ୍ୟ କରୁଛନ୍ତି। ଗତ ଜୁନ ୨୫ ତାରିଖରେ ବିଇଓ ଜୟନ୍ତ କୁମାର ରାୟ ଉକ୍ତ ବିଦ୍ୟାଳୟକୁ ପରିଦର୍ଶନରେ ଯାଇଥିଲେ। ଶିକ୍ଷକ ବୈଷ୍ଣବ ଚରଣ ବିଶ୍ୱାଳଙ୍କ ଡ୍ରେସ କୋଡକୁ ନେଇ ତାଙ୍କ ସହ ଯୁକ୍ତିତର୍କ ହୋଇଥିଲା। ପରବର୍ତ୍ତୀ ସମୟରେ ଉକ୍ତ କଥାର ଆପୋଶ ସମାଧାନ ହୋଇଥିଲେ ମଧ୍ୟ ଉଭୟ କିରାଣୀ ଓ ବିଇଓ ବୈଷ୍ଣବଙ୍କ ଦରମା ବନ୍ଦ କରିଥିଲେ। ଏହି ଘଟଣାକୁ ନେଇ ଆଜି କନିଷ୍ଠ ଶିକ୍ଷକ ସଂଘ ପକ୍ଷରୁ ଏହି ମନମୁଖୀ କାର୍ଯ୍ୟର ପ୍ରତିବାଦରେ ଆନ୍ଦୋଳନ କରାଯାଇଥିଲା।
ଉକ୍ତ ପ୍ରତିବାଦ ସଭାରେ କନିଷ୍ଠ ଶିକ୍ଷକ ସଂଘର ସଭାପତି ଶଙ୍କର କାଣ୍ଡି, ସମ୍ପାଦକ ଶୁଭେନ୍ଦୁ ଖଟୁଆ, ବିବେକାନନ୍ଦ ନାୟକ, ପ୍ରକାଶ ଚନ୍ଦ୍ର ଦାସ, ବିଶ୍ୱ ରଞ୍ଜନ ଖଣ୍ଡୁଆଳ, ସୁଦର୍ଶନ ସ୍ୱାଇଁ, ନବ କିଶୋର ପଣ୍ଡା, ଦେବଯାନୀ ଆଚାର୍ୟ୍ୟ, କାହ୍ନୁ ଚରଣ ଦାସ, ଶୁଭଶ୍ରୀ ମଲିକ, ବିଭୂତି ଭୂଷଣ ବେହେରା ପ୍ରମୁଖଙ୍କ ସହିତ ଅନେକ କନିଷ୍ଠ ଶିକ୍ଷକ ଯୋଗ ଦେଇଥିଲେ ।
